Kontribusyon, Dili Kalimtan – SSS

Ni Alex Mapoy

Nagdasok ang mga membro sa Social Security System aron paghimo sa ilang transaksyon.

BUTUAN CITY – Gi-awhag sa Social Security System (SSS) Butuan ang tanang employer nga dili kini mahikalimot pag-remit sa binulang kontribusyon ingon man salary loan sa mga empleyado ning tuiga.

Ilawom sa Republic Act 8282 o mas naila nga Social Security Act of 1997, estrikto nga gimandoan sa ahensya ang tanang employer nga sundon ang nakalatid sa maong balaud sa ingon dili kini mag-atubang og asunto ug multa.

Lakip usab nga gi-awhag sa opisyal ang tanang membro nga self-employed nga magtinundo kini sa pag-remit sa kontribusyon ug dili kini mo lapas sa gitakdang petsa sa pagbayad.

Sumala ni SSS Butuan Assistant Branch Head Arnold Pepino, angay nga dili kalimtan sa mga employer ingon man sa mga self-employed nga membro sa pag-remit sa kontribusyon sa dili pa mapaso ang tagal nga gihatag.

Dugang ni Pepino, matag membro dunay deadline sa pag-remit ug kini makita sa kataposan sa digit.

Sa higayon matod pa nga dili kini makabayad sa deadline, dili na kini mahimo pa nga bayran sa sunod nga mga adlaw ug ang mahitabo, mabuslot ang data sa kontribusyon.

Importante matod pa sa opisyal nga permi mag-remit ang membro sa kontribusyon sanglit alang man usab kini sa kaayohan sa matag usa.