80 Butuanon, Gradwit sa Parole

Ni Alex Mapoy

Chief Probation and Parole Officer Cristina R. Argente

BUTUAN CITY – Otsenta (80) ka mga kliyente sa Parole and Probation Administration (PPA) Butuan ang gibana-bana nga nakahuman sa superbisyon sa nasangpit nga buhatan sa nakalabay'ng tuig.

Sumala ni Chief Probation and Parole Officer Cristina R. Argente, mayorya sa mga kliyente nga na terminate sa superbisyon sa nasangpit nga buhatan mao ang mga lalaki diin gamay lamang ang mga babae.

Dugang ni Argente, ilang gi-terminate ang mga nahisgotan sanglit nakahuman na sila sa gitakdang mga tuig ug bulan sa pagpailawom sa superbisyon sa buhatan ug gawasnon na silang nakabalik sa tagsa-tagsa ka komunidad.

Sa kabahinan sa opisyal, dako ang ilang kalipay nga nahimo silang kabahin sa pagporma sa kinaiya sa ilang mga kliyente nga nakahuman na sa superbisyon dungan sa panghinaut nga mahimo na kining maayong ehemplo sa katilingban ug labaw sa tanan, mahimong produktibong indibidwal.

Gipasabot sa opisyal, bisan pa man og managlahi ang kinaiya sa mga nahisgotan, apan sa tabang sa ilang buhatan, nahimo kining buotan ug masaligan.

Una nang gipanawagan sa opisyal sa nanglabay nga mga bulan nga dili angayan kahadlokan ang mga nahisgotan ug labaw sa tanan, dili angay nga i-discriminate sa natad sa panarbaho sanglit nagbag-o na kini sa kaugalingon.

Kon nakasala ang mga nahisgotan niadto, ila kadtong nahimo tungod sa wala damha nga panghitabo ug nabiktima usab sila sa kahigayonan hinungdan nga dili sila angay nga pagayubiton ug kahadlokan.