Iodized Salt Gibida

Ni Alex Mapoy

Dako og ikatabang ang Iodized Salt sumala ni NNC Caraga Nutrition Officer III Retsebeth M. Laquihon sa lawas sa tawo alang sa survival ug development niini. 

BUTUAN CITY – Gibida sa National Nutrition Council (NNC) Caraga ang paggamit sa Universal Salt Iodization (USI) ngadto sa mga Caraganon.

Katuyoan niini nga mabatokan ang kakulang sa iodine sa lawas sa matag indibidwal.

Sumala ni NNC Caraga Nutrition Officer III Retsebeth M. Laquihon, ang Iodine importante kaayo sa lawas sa tawo alang sa survival ug development.

Pinasikad sa pagtuon sa mga eksperto, kon kulang og Iodine ang indibidwal, ubos kini og timbang labi na kadtong bag-ong gipakatawo nga bata, dunay posibilidad ang batang gisabak nga mapunit, ug dunay posibilidad nga ma-mental ug physical retarded.

Dugang ni Laquihon, kon ang indibidwal dunay sufficient iodine sa lawas, ang Intelligence Quotient (IQ)niini ang taas sa halos 10 – 15 puntos kon itandi niadtong indibidwal nga kulang og iodine.

Sa nakalabay’ng 2010 Census dinhe sa Pilipinas, 4 sa 10 ka mga bata nga nag-edad 6 – 12 anyos, 5 sa 10 ka mga babaeng nagsabak ug 6 sa 10 ka mga inahan nga nagpasuso ang anaa sa moderate, mild, severe iodine deficiency.

Alayon niini, gidasig sa opisyal ang tanang Caraganon sa paggamit sa USI aron mapugngan ang Iodine deficiency, barato usab kini nga mapalit sa supermarket, groceries, ug drugstores.

Ning panahona, 44% sa mga pamilya ang nagpalit og Iodized salt samtang ang nabilin nga 56% nga pamilya ang nagpalit sa gitawag nga “takal salt.”