Pagpakusog sa Produksyon Gipaningkamotan

Ni Alex Mapoy

Kayod-kalabaw ang Department of Agriculture (DA) pagtabang sa mga mag-uuma nga mahimong mabungahon ang ilang paningkamot labi na sa pananom niining humay ug dili maalkansi sa pag-usab usab sa klima.

BUTUAN CITY – Sa tinguha nga dili maalkansi ang mga mag-uuma sa produksyon sa humay, gilusad sa Department of Agriculture (DA) Caraga ang School on the Air (SOA) on Rice and Climate Change sa lungsod sa Bunawan sakop sa probensya sa Agusan del Sur.

Mokabat sa 258 ka mga enrolled participants maoy magsilbing estudyante sa maong programa.

Sumala ni DA Caraga Information Officer II Rhea Abao, madungog ang nahisgotang programa sa matag adlaw nga Bernes, DXAK 99.9 FM alas- 5:00 hangtod alas-6:00 sa gabii.

Dugang ni Abao, gidumala ang maong programa ni DA Caraga Regional Agriculture Fishery Council Public Information Officer Alfredo Lobog.

Katuyoan sa maong programa mao ang pagpasabot sa tanang enrolees ingon man mag-uuma kabahin sa pag-usab usab sa dagan sa panahon diin ilawom niini mao ang pagbida sa nagkadaiyang variety sa humay nga haum sa klima, pagpakusog sa relasyon sa ahensya ug sa mga mag-uuma dungan sa pagdasig nga mahimong responsable ang mga nahisgotan sa pag-atiman sa tinanom niining humay, ug pag-umol sa panghunahuna sa mga mag-uuma nga mahimong positibo labi na sa paghangop sa gibida nga makinarya pang-uma alang sa mas paspas nga pag-ugmad sa basakan sa ingon maminusan ang galastohan.

Mahuman ang nasangpit nga SOA sa kataposang Bernes sa bulan sa Oktobre ning kasamtangang tuig.

Nanghinaut ang opisyal nga daghan ang makat-onan sa tanang partisipante sa maong programa alang sa mas abunda nga produksyon ning rehiyon.