Bloodletting sa Capitol, Gilangaw

Ni Alex Mapoy

Kinaiya sa Pilipino nga abtik mangayo, apan kon maoy pangayoan, magdumili. Ang mga tiil nga makita sa unahan nga naglinya mao ang mga Pilipino nga nangayo og serbisyo. Apan sa mga boluntaryong mi-donar og dugo, mas daghan pa ang folding-bed nga gi-andam sa PRC Butuan City – Agusan del Norte Chapter. 

BUTUAN CITY – Daghan ang nanginahanglan, apan diyutay lamang ang ni-donar sa kaugalingong dugo ngadto sa Philippine Red Cross (PRC) Butuan City – Agusan del Norte chapter.

Sa gihimong bloodletting activity atol sa ika-63 ka tuig nga anibersaryo sa katukoran sa RMN DXBC Butuan sa Capitol Covered Court, Capitol Compound ning siyudad, halos gilangaw kini sa mga mi-donar sa kaugalingong dugo.

Una nang gi-angkon ni PRC Agusan del Norte – Butuan City Blood Center In-Charge Dan Mark B. Moral nga mo duwa lamang sa 400 hangtod 600 ka bag sa dugo ang makolekta sa buhatan matag bulan kansang koleksyon ang dili ka apas sa panginahanglan sa dugo.

Ang maong gidaghanon mao lamang ang matigom sa buhatan taliwala sa kadaghan sa mga bloodletting activity nga ilang gihimo sa nagkadaiyang dapit ning siyudad ug sa probensya sa Agusan del Norte.

Nasuta ang buhatan nanginahanglan og labing minus 800 ka bag sa dugo aron masuplayan ang panginahanglan sa mga Agusanon lambigit sa dugo.

Daan nang giklaro sa opisyal nga wala nagkulang ang ilang buhatan pag-awhag sa katawhan nga mag-donar og dugo aron daghang kinabuhi ang maluwas.

Isa sa nakita niining hinungdan nganong kanunay magkulang ang suplay sa dugo ug gamay lamang ang mag-donar sa kaugalingong dugo mao ang kahadlok nga makuhaan og dugo.

Gawas niana, isa usab sa nakapasamot nganong gamay lamang ang mag-donar og dugo mao ang blood processing fee nga P1,800.

Alang sa opisyal, mapugos sila pagkolekta sa processing fee sanglit wala silay pundo alang sa screening test sa dugo.

Nimahal matod pa ang gikinahanglang gamit alang sa pagproseso sa dugo hinungdan nga nausbawan og P300 ang kanhi nga P1,500 nga processing fee.

Importante usab matod pa nga ipailawom sa screening test ang dugo nga nakolekta aron dili ma-abuno kadtong dugo nga kontaminado sa makatakod nga sakit.