Breast Milk Walay Makatumbas – NNC

Ni Alex Mapoy

Caraga Nutrition Officer III Retsebeth

M. Laquihon

BUTUAN CITY – Kon tinuod nga naglantaw ang inahan sa kaayohan sa anak, angayan kining pasusuhon ug dili hatagan sa infant formula.

Sumala ni National Nutrition Council (NNC) Caraga Nutrition Officer III Retsebeth M. Laquihon, walay makatupong sa gatas sa inahan kon bitamina ang hisgotan sanglit kompleto kini.

Dugang ni Laquihon, mas suod ang bata sa inahan kon kini gipasuso sanglit mabati sa bata ang motherly care o inahanong pag-amoma hinungdan nga dili angayang idawo sa inahan ang gatas ngadto sa anak.

Tambag sa opisyal, niadtong inahan nga dunay trabaho, mas maayong isulod ang gatas sa bottle og ibutang kini sa refrigerator.

Katuyoan niini nga kon gutomon ang batang masuso, mahatagan gilayon kini sa gatas sa inahan.

Basi sa pagtuon sa mga eksperto, ang infant formula gikonsidera nga mas taas ang risgo sa kamatayon kon itandi niadtong batang masuso nga gipasuso sa gatas sa inahan.

Subay niini, girekomenda sa World Health Organization (WHO) nga isa ka oras gikan sa pagkahimugso sa bata, angayan nga pasusohon kini sa inahan.

Pasusohon ang bata sa inahan sulod sa unang unom ka bulan sanglit ikaayo kini sa panglawas sa bata.

Human sa unang unom ka bulan, mas maayong ipadayon ang pagpasuso hangtod duha ka tuig.