Halos 20-mil Agusanon, Wala Narehistro

Ni Alex Mapoy

AGUSAN DEL NORTE – Doble – kayod ang buhatan sa Commission on Election (Comelec) Agusan del Norte nga ma-rehistro ug makuhaan og biometric ang halos 20,000 pa ka mga Agusanon.

Kabahin sa paningkamot sa buhatan mao ang pagpahigayon og Satellite Registration aron maseguro nga marehistro ang tanang botante.

Dinhe sa Butuan, dunay gitakdang Satellite Registration diha sa Robinson’s Place Butuan karong Agosto 30 ug Septembre 27 nga pulos natunong sa kataposang Dominggo sa nahisgotang mga bulan.

Hisayran nga duha na lamang ka bulan kapin ang gihatag nga panahon sa komisyon sa mga botanteng Agusanon pagpa-rehistro ug pag-validate sa ilang rehistrasyon.

Pinasikad sa datos adtong Hulyo 31, 2015, mokabat pa sa 17,723 ka mga Agusanon ang wala nakaparehistro ingon man biometric; 95 usab ka mga botante ang makonsiderang incomplete ang rehistrasyon diin kulang kini sa thumb mark, perma, o kaha hulagway samtang mokabat na sa 368,859 ka mga botanteng Agusanon ang puwedeng makaapil sa sunod tuig nga piliay sanglit gawas nga narehistro na, duna pa kini biometric.

Sa kinatibuk-an, kon marehistro ang mga botante nga wala pa nakaparehistro ug makompleto na kadtong botante nga gikonsiderang incomplete, mokabat sa 386,677 ka mga botanteng Agusanon ang mahimong makabotar sa sunod tuig nga eleksyon.

Hangtod lamang sa Oktobre 31, 2015 ang pagpangdawat sa komisyon alang niadtong gusto nga magparehistro ug mag-validate sa daan niining rehistrasyon nga wala makompleto.

Gibarugan sa komisyon, kadtong botante nga walay biometric ug dili maka-validate sa rehistrasyon sulod sa gitakdang tagal, dili kini tugtan nga makabotar.

Bisan pa og nakabotar kini adtong Oktobre 2013, sa ngalan nga wala kini biometric, dili kini makabotar sa sunod tuig nga piliay.