Plastic Nakadaut sa Coral Reef

Ni Alex Mapoy

Angayang undangon sa katawhan ang paglabay og plastic sa dagat aron dili madaut ang coral reef, awhag ni DENR Caraga RD Nonito Tamayo.

BUTUAN CITY – Gitumbok sa Department of Environment and Natural Resources (DENR) Caraga nga isa sa mga hinungdan nganong nadaut ang mga coral reefs mao ang padayon nga paglabay sa mga tawo og pastic ngadto sa kadagatan.

Sumala ni DENR Caraga Communications Development Office Chief Eric Herzon F. Gallego, gi-awhag ni DENR Caraga Regional Director Nonito Tamayo ang katawhan pag-undang paglabay og mga plastic sa dagat.

Dugang ni RD Tamayo, isa kini sa mga paagi nga mahimong malipayon ang kinabuhi uban ang healthy nga dagat ug kinaiyahan.

Pamugos ni Tamayo, ang gipanglabay nga plastic sa dagat maghatag peligro sa mga nanimuyo sa dagat sama sa isda.

Maguba usab ang mga itloganan sa isda sanglit matabunan naman unya sa mga plastic nga gilabay sa mga tawo.

Sa gihimong pagtuon sa UNESCA Greenpeace ASEAN Center for Biodiversity, 40% sa 86,205 square kilometers sa coral reefs sa kadagatan sa Southeast Asia ang nawala gumikan sa pagkaguba tungod sa hinimuan sa tawo lakip niini ang paglabay og mga plastic.

Alang sa direktor, makonsidera kini nga alarming nga ang plastic maoy “top contributor” sa polusyon sa dagat hinungdan nga angayang undangon na sa tanang tawo ang paglabay og plastic sa dagat.