PressCon sa City Hall Scripted

Ni Alex Mapoy

ISLAND OF GOOD GOVERNANCE. Gibida ni Butuan City Mayor Dr. Ferdinand Amante, Jr. ang maong pasidungog ngadto sa mga media atubangan sa gatosan ka mga empleyado. Dihang gipangutana kabahin sa nag-unang isyu ning siyudad, naglikay kini pagtubag. Kadtong media nga mangahas pagpangutana sa bisan unsa nga isyu, dali kining badlungon sa moderator sa nahisgotang kalihokan. 

BUTUAN CITY – Nadismaya ang tanang media practitioner nga nitambong sa gipatawag nga Press Conference ni Butuan City Mayor Dr. Ferdinand Amante, Jr. human pinili ang mga pangutana nga ibato ngadto sa opisyal atubangan sa gatosan ka mga empleyado.

Pipila ka minuto adiser gisugdan ang kalihokan, gihatagan og papel ang mga media nga nitambong aron malista nang daan ang mga pangutana nga ipatubag sa amahan sa siyudad.

Ang mga pangutana nga naghisgot sa mga lehitimo nga problema sa siyudad ang gipadaplin ug bugtong gitawag kadto lamang pangutana nga pabor sa administrasyon ug may kalabotan sa Island of Good Governance (IGG).

Taliwala pa man sa gihimong maniubra, nilusot ang pangutana tumong kang Mayor Amante kon nganong wala nasulbad sa lokal nga panggamhanan ang isyu sa hitak nga drugas sa Barangay Ong Yiu.

Nibawos lamang si Mayor Amante ug pahiyom ngadto sa media ug gisundan kini sa kantsaw sa mga empleyado sa City Hall nga nagpalibot sa naasoy’ng lugar.

Daling gibadlong ni Israel Palero, kinsa maoy nagsilbing moderator sa maong PressCon ang media nga nipaabot sa maong pangutana ug nihangyo nga i-sentro ang pangutana sa IGG.

Apan, gipamugos ni Neline Gambuay, ang Marketing Officer/Reporter sa The Caraga Bulletin kon nganong dili tubagon ang maong pangutana nga ang gihisgotan bahin man sa Good Governance.

Diha na nitubag si Mayor Amante nga ang druga matod pa, usa ka “global problem” hinungdan dili kini masumpo.

Pasalig na lamang sa opisyal ngadto sa tanang media nga maningkamot ang kapulisan pagsumpo sa kuyanap nga drugas ning siyudad.