Dengue sa Caraga, 25 Patay

Ni Alex Mapoy

BUTUAN CITY – Baynte – singko (25) na ang patay gikan sa kinatibuk-ang ihap nga 3,540 ka mga kaso sa dengue sa rehiyon sa Caraga sa unang napulo ka bulan ning tuiga.

Sa maong period, ang siyudad sa Butuan nitala og 4 ka buok patay sa dengue kinsa nanimuyo sa Barangay Pigdaulan, Barangay Ampayon, Barangay Libertad, ug Barangay Amparo.

Basi sa datos sa Department of Health (DOH) Caraga, pinakadaghan nga kaso sa dengue nga natala ang gikan sa Surigao del Sur nga dunay 704 ka buok; 676 sa dakbayan sa Butuan; 645 sa Agusan del Sur; 341 sa siyudad sa Surigao; 307 sa Agusan del Norte; 262 sa dakbayan sa Bayugan; 246 sa Surigao del Norte; 110 sa dakbayan sa Bislig; 105 sa siyudad sa Cabadbaran; 73 sa dakbayan sa Tandag; ug 71 sa Dinagat Islands.

Ang nahisgotang ihap matod pa, mas ubos og 48% kon itandi sa nakalabay’ng tuig sa samang period nga nilansang sa 6,827 ka mga kaso.

Gikabutyag ni DOH Caraga Assistant Regional Director Dr. Cesar Cassion, sa bulan lamang sa Oktobre partikular na sa mga petsa 1 hangtod 24 ning tuiga, nakatala ang rehiyonal nga buhatan og 230 ka mga kaso sa dengue diin 68 niini gikan sa Surigao del Sur, 63 ka mga kaso gikan sa Agusan del Sur, ug 28 ka mga kaso gikan sa siyudad sa Butuan.

Dugang ni Dr. Cassion, kasagaran matod pa sa mga nataptan mao kadtong nag-edad isa ka bulan hangtod 91 anyos ug kasagaran sa mga nataptan mao ang mga lalaki samtang 38% sa mga kaso nag-edad og 0 – 10 anyos.

Subay niini, hugot nga gitambagan sa opisyal ang publiko nga mintinahon ang paghinlo sa palibot ug gub-on ang mga lim-aw nga mahimong itlogan sa lamok nga magdala sa sakit nga dengue.

Batasanon usab matod pa ang pagpaaso sa palibot sa panimay aron mapuhag ang mga lamok nga carrier sa dengue nga sakit.