Reward Batok Lumad Killers, Gihanyag

Ni Alex Mapoy

Photo courtesy of Karapatan Caraga

TANDAG CITY – Mihanyag na ang probensyal nga panggamhanan sa Surigao del Sur og reward ngadto sa makatudlo ug makadakop sa tulo ka mga suspetsado sa September 1 Lumad Killings human pakyas ang awtoridad pagdakop sa mga nahisgotan.

Nasubo matod pa si Governor Johnny Pimentel nga kapin duha ka bulan na ang nakalabay sa paglutos sa kapulisan ug kasundalohan sa mga kriminal, apan hangtod karon, wala pay nadakpan.

Basi sa impormasyon nga nahipos gikan sa Philippine Information Agency (PIA) Caraga, andam mohatag ang probensyal nga panggamhanan ni Governor Pimentel og tag – P200,000 batok sa mga nahisgotan.

Ang maong reward gihanyag sa gobernador atol sa pagbisita sa mga pari nga sakop sa Iglesia Filipina Independiente (IFI) sa nakalabay’ng semana.

Tuyo matod pa sa opisyal nga mapadali ang pagdakop sa mga suspetsado nga sila Loloy Tejero, Bobby Tejero, ug Garito Layno kinsa nag-atubang sa tag – tulo ka ihap sa kasong pagpatay, pagpangsunog, pagpanghulga, ug pagpanulis.

Dihang nasayran nila PNP P/SSupt. Narciso Verdadero ug AFP Col. Isidro Purisima ang hanyag sa gobernador, bugtong komento sa mga nahisgotan nga dako og ikatabang ang maong reward alang sa pagdakop sa mga nahisgotan.

Hisayran nga nagmugna ang kapulisan ug militar og Task Force Bangkaw alang sa pagsikop sa mga nahisgotan, apan hangtod karon, pabilin pa gihapon kining gawasnon.