PDI Madeklarang Rabies Free?

Ni Alex Mapoy

Kumpiyansa ang probensyal nga panggamhanan sa Dinagat Island nga madeklarang Rabies Free Zone ang tibuok probensya sulod ning tuiga. Photo credit to DA Caraga Public Relations Officer II Aurelius P. Arais

PROVINCE OF DINAGAT ISLAND (PDI) – Kampante ang probensyal nga kagamhanan sa Dinagat Island nga madeklarang Rabies Free Zone ang tibuok probensya sulod ning tuiga.

Pinasikad sa General Guidelines, madeklara lamang Rabies Free Zone ang usa ka dapit kon kini hugot nga nipatuman sa Local Ordinance lambigit sa Rabies Prevention and Control Program ug walay matalang kaso sa rabies sa nakalabay’ng duha ka tuig.

Butyag ni DA Caraga Public Relations Officer II Aurelius P. Arais, gipaneguro ni DA Caraga Regional Animal Rabies Coordinator Dr. Esther Cardeño nga hugot nga ni-abag ang rehiyonal nga buhatan sa agrikultura ug sa Department of Health (DOH) Caraga uban ang mga counterpart sa kalungsoran nga sakop sa maong probensya aron masunod niini ang gikinahanglang rekisitos aron mahimo kining “compliant” labi na sa pagpatuman sa Rabies Prevention and Control Program.

Giklaro usab ni Dr. Navelle Calub sa Bureau of Animal Industry (BAI) sa Department of Agriculture (DA) Caraga nga atol sa gihimong ebalwasyon sa kada lungsod sa PDI nga ang pag-rekognisa sa usa ka dapit nga Rabies Free Zone, usa ka dakong dungog nga nagtangag og kaakohan.

Nagtimaan kini nga luwas ug mahimong kampante ang tanang turista nga magsuroy-suroy sa girekognisang dapit sanglit wala man unya kini kabalak-an bahin sa rabies.

Gitin-aw ni Arais, kon ugaling matuman sa PDI ang gikinahanglan nga rekisitos, ang probensya unya sa PDI maoy pinakaunang probensya ning rehiyon sa Caraga ang makonsiderang Rabies Free Zone.

Una nang gideklarang Rabies Free Zone ang lungsod sa Soccoro sakop sa probensya sa Surigao del Norte sa nakalabay’ng tuig.

Hisayran nga sa nakalabay’ng bulan, gi-ebalwit sa pipila ka personahe sa Bureau of Animal Industry (BAI) sa Department of Agriculture (DA) Caraga ug DOH Caraga ang kalungsoran sa nahisgotang probensya.

Ang naglangkob sa BAI Team mao sila Dr. Novelle Calub, Dr. Daphne Jorca, ug Dr. Joy Lagayan samtang sa DOH Caraga, gipangunahan kini ni National Rabies Program Manager Dr. Raffy Deray.