Accredited Slaughterhouses, 5 Lang – NMIS Caraga

Ni Alex Mapoy

Gilista ni NMIS Caraga Senior Meat Control Officer Dr. Bernadette Montenegro ang mga accredited nga slaughterhouses sa tibuok rehiyon sa Caraga. Photo by Alex Mapoy

BUTUAN CITY – Lima lamang ka mga slaughterhouses ang kasamtangang accredited sa National Meat Inspection Service (NMIS) Caraga.

Gilangkoban kini sa Agusan del Norte, ang Cabadbaran City Slaughter House; sa Agusan del Sur ang Prosperidad Slaughterhouse, VPO (Rosario) Slaughterhouse; sa Surigao del Sur, ang Bislig City Slaughterhouse, ug Groon Pine Slaughterhouse.

Sumala ni NMIS Caraga Senior Meat. Control Officer Dr. Bernadette Montenegro, ang ubang Slaughterhouses sa nagkadaiyang bahin ning rehiyon ang padayon pang nag-proseso sa renewal samtang ang uban, dili accredited sa rehiyonal nga buhatan.

Dugang ni Dr. Montenegro, ni-ubos ang ihap sa mga accredited slaughterhouse sanglit matag tuig kini kinahanglang mag-renew sa akreditasyon.

Basi sa datos, ang Butuan City Slaughterhouse, Buenavista Slaughterhouse, ug Nasipit Slaughterhouse ang padayon kining nag-proseso sa renewal sa akreditasyon.

Adiser mahuman ang kasamtangang tuig, gilauman sa opisyal nga madugangan ang ihap sa mga slaughterhouse nga accredited sa gidumalang ahensya.

Samtang ang ubang slaughterhouse sa kalungsoran ug pipila ka siyudad ang padayon nga naningkamot nga makapasar sa gikinahanglang rekisitos aron kini mahimong accredited sa ahensya. 

Dumdoman nga sa sayong bahin sa bulan sa Nobyembre sa nakalabay’ng tuig, mismo si Agriculture Secretary Proceso J. Alcala ang nitambag sa tanang konsumidor nga adto lamang kini palit og karne nga giihaw sa mga accredited slaughterhouses, LGU registered slaughterhouses, ug meat shops aron dili kini makapalit sa gitawag sa kalihim nga “hot meat” o “double-dead meat.”

Gikonsiderang hot ang karne kon kini wala giihaw sa slaughterhouse nga dili accredited sa NMIS o kaha sa LGU sanglit wala kini napailawom sa inspeksyon sa qualified meat inspector.