Pagkaon sa Masustansyang Pagkaon Giawhag

Ni Alex Mapoy

TAMBAG: Gidasig ni Grade VI Adviser Rosette Geducos ang tanang magtutungha nga atimanon ang lawas aron kanunay kining himsog. Maangkon lamang ang himsog nga panglawas kon batasanon ang pagkaon sa masustansyang pagkaon ug kanunay’ng mag-eherisyo. Photo by Alex Mapoy

BUTUAN CITY – Gitambagan sa kadumalahan sa Rainbow of Angels Learning Center, Inc. nga nahimutang sa 218 Montilla Boulevard, ning siyudad ang tanang estudyante nga atimanon ang panglawas pinaagi sa pagkaon sa masustansya nga pagkaon.

Sa gipahigayong Nutrition Month Culmination Program sa nasangpit nga tunghaan, kinasingkasing nga gi-awhag ug gipasabot ni Grade VI Adviser Rosette Geducos ang tanang magtutungha nga atimanon ang lawas aron kanunay kining himsog.

Butyag ni Geducos, kanunay lagsik ang lawas kon ang gikaon nga pagkaon puno kini sa bitamina ug niana, maangkon ang saktong timbang.

Gawas sa masustansiyang pagkaon, batasanon usab matod pa ang pag-ehersisyo aron mo sirkula ang dugo nga anaa sa lawas ug niana, dili luya ang lawas.

Pamugos ni Geducos, ang lawas mao ang temple sa Dios hinungdan nga angayan lamang kining atimanon aron makabuhat kini sa mga butang sibo sa kabubut-on sa Ginoo.

Subay sa gihimong kulminasyon, ubay – ubay nga mga kalihokan ang gipahigayon sa tibuok adlaw diin mismo ang mga ginikanan sa naasoy’ng mga bata ang nitambong sa maong aktibidad.

Tanang kalihokan nakapunting sa tema, Timbang Iwasto sa Tamang Nutrisyon at Ehersisyo aron maengganyo ang kabataan sa paghatag importansiya sa lawas niini.

Nahimong malamposon ang kalihokan subay sa pagsuperbisa ni Principal Rosalyn N. Cortel inabagan sa tanan niining naglangkob sa faculty and staff sa maong pribadong eskwelahan.