Pagmanehong Nakainom, Likayan

Ni Alex Mapoy

TAMBAG: Angayan likayan ang pagmanehong 

hubog aron kini malikay sa disgrasya, awhag ni 

SPO4 Anisberto Rivera, ang Officer-In-Charge

 sa Traffic Section sa Butuan City Police Station 

1. Photo by Alex Mapoy

BUTUAN CITY – Likayan ang pagmaneho og sakyanan nga impluwensiyado sa ilimnong makahubog aron dili kini madisgrasya ug mabalhog sa bilangguan.

Awhag kini ni SPO4 Anisberto Rivera, ang Officer-In-Charge sa Traffic Section sa Butuan City Police Station 1 ngadto sa tanang driver sa motorsiklo man o sa 4-wheel vehicles.

Sumala ni SPO4 Rivera, dakong problema sa driver kon kini mag-drive nga hubog sanglit kon kini makadisgrasya, segurado nga kini mapriso.

Dugang ni SPO4 Rivera, peligroso nga magmanehong hubog sanglit dili kini maka-concentrate sa pag-drive ug duol ra usab kini sa disgrasya.

Kon masakpan nga nagmanehong hubog, bug-at nga silot ang atubangon sa hingtungdang driver subay sa nakalatid sa Republic Act (RA) 10586 o mas nailang Anti-Drunk and Drugged Driving Act of 2013.

“Kinahanglan nga mag-drive, dili hubog. Once nga hubog mag-drive, unya, madisgrasya, mapriso gyud,” awhag ni Rivera.

Gitin-aw sa opisyal, simple lamang ang buhaton aron malikayan ang disgrasya sa dalan ug dili usab masilotan tungod sa pagmanehong hubog mao lamang ang pag-amping sa pagmaneho ug kon naka-inom, dili kini mo drive og sakyanan.

Pamugos sa opisyal, mas maayong managanang daan sanglit ang disgrasya sa dalan dili mahibaw-an diin madisgrasya pa man gani matod pa kadtong wala nakainom, unsa pa kaha kadtong nagmaneho nga lango sa bino de pataranta.

Ang nahisgotang pahimangno dili kini bag-o sanglit suble-suble na usab kining gipanawagan ni DOTC Caraga Operation’s Division Chief Engr. Eugene Rula sa tanang driver ang “defensive driving.”