Caraganon Students Gipurga

Ni Alex Mapoy

HAND WASHING: Gitin-aw ni DOH Caraga Regional Director Dr. Jose Llacuna nga pinaka-epektibo pa gihapong paagi nga mabatokan ang nagkadaiyang sakit ug dili bitokon ang tawo mao ang saktong paghugas sa kamot. Photo by Alex Mapoy

BUTUAN CITY – Dul-an tunga sa milyon ka mga estudyante sa Caraga ang dungan nga gipurga sa Department of Health (DOH) Caraga uban sa pag-abag sa Department of Education (DepEd) Caraga, ug Department of Interior and Local Government (DILG) Caraga isip pagsuporta sa National School Deworming Day kagahapong adlawa.

Nasuta ang pagpurga sa kabataang magtutungha, wala lamang kini gihimo ning rehiyon kondi dungan kining gihimo sa tibuok nasod insakto alas-10:00 sa buntag.

Basi sa datos, mokabat sa kinatibuk-ang 465,234 ka mga estudyante nga na enrol sa 1,636 ka mga pampublikong tunghaan sa elementarya ning rehiyon ang gipurga.

Ang naasoy’ng kabataan nagtungha gikan Kindergarten hangtod Grade 6 sa pampublikong tunghaan.

Pursigido ang kabataan nga likayan nga dili bitokon aron magpabiling himsog ang panglawas ug dali kining makasabot sa leksyon. Photo by Alex Mapoy

Subay sa kalihokan, gitudloan ang kabataan kon unsay sakto nga pagpanghugas sa kamot, mga pagkaon nga puno sa bitamina, ug saktong pag-toothbrush.

Gipasabot ni DOH Caraga Regional Director Dr. Jose Llacuna, Jr. ang saktong paghugas sa kamot makatabang nga dili mataptan ang matag usa og sakit ingon man ang saktong hygiene.

Dugang ni Dr. Llacuna, dako og epekto ang bitok sa tubo sa bata o sa panglawas sa kinatibuk-an.

Pipila sa mga timailhan sa batang gibitok mao ang abnormal nga pagdako sa tiyan, pagbalik-balik og pagawas sa hugaw, pagsuka, ug pag-ubos sa timbang.

Dunay mga kaso nga bisan dili masinati ang maong mga timailhan, dili pa gihapon kini makonsidera nga wala kini bitok sa tiyan.

Ang bitok sa tiyan usa matod pa ka klase sa impeksyon diin dunay bitok sa tawo nga kusog mo supsop sa nutrisyon sa lawas nga angay lamang unta sa tawo hinungdan ang hingtungdan luspad o anemik.

Kon managhan ang bitok sa tiyan, ang hingtungdan kanunay lamang magluya.

Gipasabot usab ni DepEd Caraga OIC Regional Director Rebecca Delapuz, angayang sumpoon ang bitok nga anaa sa tiyan sa bata sanglit dako kini og epekto sa panabot sa bata hinungdan nga makatarunganon lamang nga purgahon kini sa ingon magpabiling himsog ang panglawas sa kabataang magtutungha.

Ang maong kalihokan gilusad sa Butuan Central Elementary School nga nahimutang sa Brgy. Diego Silang ning siyudad nga gisabak sa tema, “Oplan: Goodbye Bulate.”