Pagkawala sa Tubig, Kalbaryo sa Konsumidor

Ni Alex Mapoy

KALBARYO: Kon mawala ang suplay sa tubig sa water district, mahimong aburido ang utok sa tawo sanglit wala kini magamit pangdung-ag, panghinlo, pang-inom, ug labaw sa tanan, walay ligo.

BUTUAN CITY – Kalbaryo sa mga konsumidor sa Butuan City Water District (BCWD) labi na sa mga namuyo sa tumoy’ng bahin sa service area human nasinatian ang pagkawala sa suplay sa tubig.

Hisayran nga ning ulahing mga adlaw, nasinatian sa katawhang Butuanon ang dalan-dalan nga pagbundak sa makusog nga ulan inubanan sa pagpangilat ug panalugdog.

Ang maong senaryo maoy hinungdan nga na apektohan ang suplay sa tubig human gibundakan sa makusog nga ulan ang Taguibo Watershed Area.

Bunga sa ulan, nasinatian ang grabe ka lubog sa tubig hinungdan nga dunay higayon nga napugos pag-shutdown ang water district sa pasilidad nga nahimutang sa nahisgotang area.

Isip inisyatiba, gipagana ang 5 ka mga pumping stations aron lamang makasuplay og tubig sa tibuok siyudad, apan gumikan sa kagamay sa bulto sa tubig nga na prudyos, ang sentrong bahin lamang maoy nakabaton og suplay sa tubig samtang kadtong mga barangay nga nahimutang sa tumoy’ng bahin sa service area ug habog nga lugar, walay tubig nga ni-agas sa tagsa-tagsa niini ka gripo.

Sa ulahing impormasyon nga gipaabot ni BCWD Senior Public Relations Officer Ramil S. Barquin, ang kalubog sa tubig sa suba sa Taguibo ang anaa pa sa 12 NTU.

Nunot niini, ang Filtration Plant sa water district ang partial nga nag-operate aron makuhaan ang kalubog sa tubig nga mo sulod sa transmission ug distribution lines.

Sa maong kahimtang, dili pa gihapon makahatag garantiya si Barquin nga mo balik na ang normal nga suplay sa tubig gumikan usab sa dili matagna nga dagan sa panahon.

Kadtong lugar nga dunay agas, gitambagan sa opisyal ang mga konsumidor nga kanunay’ng magpundo og daghang tubig aron duna kini magamit sa higayon mawala ang suplay.

Paningkamotan usab sa water district nga mabalik sa labing dali nga panahon ang normal nga suplay sa tubig aron makatubig na kadtong mga barangay nga walay agas.

“As of 10:00 a.m., Wednesday, July 29, 2015, the turbidity level at the Taguibo River is still at 12 NTU. As such, the Filtration Plant of the Butuan City Water District (BCWD) is only partially operated to minimize the possibility of having the turbid water enter into the transmission and distribution lines of the BCWD. Current water pressure is at 290 kPa (42 psi) at Pump Station No. 1,” mensahe ni Barquin.