Retirement Benefits Gireklamo

Ni Alex Mapoy

PERFORMANCE: Gihulagway ni DOJ-PPA Caraga RD Lina K. Burdeos nga nahimong mabungahon ang 5 ka tuig niini nga pagdumala sa rehiyonal nga buhatan. Photo by Alex Mapoy

BUTUAN CITY – Ubay – ubay nga mga membro sa Social Security System (SSS) ang nireklamo kabahin sa pag-avail sa retirement benefits human wala nakapahimulos bisan nag-edad na kini og 60 anyos ug padayon pa kining gipabayad sa binulang kontribusyon.

Alayon niini, gihatagan og katin-awan ni SSS Butuan Assistant Branch Head Arnold Pepino ang kabahin sa pag-avail sa retirement benefits.

Sumala ni Pepino, duha lamang ka rekisitos o kwalipikasyon nga angay sundon sa membro aron ang retirement benefits, mapahimuslan.

Gitin-aw ni Pepino, ang rekisitos o kwalipikasyon nga gikinahanglan, ang membro nag-edad og 60 anyos pa taas ug duna kini 120 ka bulan nga kontribusyon.

Ang maong kontribusyon, wala naglantaw kon dunay buslot ang remittance sanglit bugtong gikwenta mao kadtong mga bulan nga dunay remittance.

Sa yano nga pagpasabot sa opisyal, kon ang membro nag-edad na og 60 anyos, unya, wala pa kaabot og 120 ka bulan ang kontribusyon, dili pa mapahimuslan sa hingtungdan ang benepisyo hinungdan nga aron kini mapuslan, magpadayon ang membro sa pagbayad sa kontribusyon hangtod makompleto ang 120 ka bulan.

Kon ugaling, ang kontribusyon subra na sa 120 ka bulan, unya, wala pa nag-60 anyos ang membro, dili gihapon niini ma-avail ang retirement benefits.

Sa direktang pagpasabot sa opisyal, mapuslan lamang sa membro ang retirement benefits kon kini 60 anyos na o subra pa ang edad ug dunay 120 ka bulan nga kontribusyon.

“Ma-avail sa membro ang retirement benefits kon kini nag-edad 60 anyos ug dunay 120 months nga contribution. Bisan 60 anyos na ang membro, apan wala ka abot og 120 months ang contribution, dili kini maka-retire. Unya kon subra na sa 120 months, unya wala pa ka niabot og 60 anyos, dili gihapon ka maka-retire. Classmate gyud na sila. Naa may edad nga 65 anyos na, apan ang contribution, wala ka abot og 120 months, magbayad gihapon ang membro,” pagpasabot ni Pepino.