Pulis Nitan-aw’g Motor Cross Gipatay

Ni Alex Mapoy

BUTUAN CITY – Blangko pa ang kapulisan kon unsa nga grupo nasakop ang tulo ka mga mamumuno nga nipusil patay sa usa ka pulis samtang nagtan-aw og motor cross uban ang anak babae sa Purok 2 Brgy. Bit-os sakop ning siyudad adtong Sabado, alas-3:30 sa hapon.

Nasayran nga lingaw adtong higayona ang biktima kuyog ang anak babae nga nagtan-aw sa gipahigayong motor cross sa maong dapit.

Tulo matod pa ka lalaki ang hinay-hinay nga nipaduol sa nahimutangan sa biktima ug isa sa mga nahisgotan ang kalit nga nilanit sa dalang pistola dayong pusil tumong sa likod sa biktima resulta sa pagkahagba.

Gi-usban pa sa pagpusil sa mga suspek ang biktima sa makadaghang higayon hinungdan sa hinanali niining kamatayon.

Adiser nanibat ang wala mailhing mga suspetsado sakay sa duha ka motorsiklo, nibilin pa ang mga nahisgotan og mga pulong ngadto sa biktima, PAGDROGA PA.

Subay sa hitabo, daling niresponde ang ginsakpan sa kapulisan sa pagpanguna ni SPO1 Jonathan A. Basil uban sa pag-abag ni SPO3 Orillosa kinsa gikan sa Reaction Team.

Niabot usab sa maong lugar ang SOCO Team gikan sa Regional Crime Laboratory 13 sa pagpanguna ni Police Inspector Jefrox Panaligan.

Sa imbestigasyon nga gihimo nila SPO1 Basil ug PO3 Ronald P. Bitangcor, naila ang biktima nga si SPO1 Michael Eballar Evanoso, 41 anyos, membro sa han-ay sa kapulisan ug nadestino sa Regional Headquarter Support Group Police Regional Office 13, residente sa Block 26 Lot 36, Emenville Subdivision, Brgy. Ambago ning siyudad.

Nakuha sa awtoridad sa crime scene ang 2 ka basiyo sa bala ug 2 ka balinis sa punto 45 nga pistola.

Sa pagkutlo niini nga balita, padayon pang gipanubayan sa mga imbestigador aron mailhan ang mga mamumuno ug matultolan ang nahimutan sa ingon kini madakpan ug manubag sa salaud nga nahimo.