Rehimeng Aquino Bakakon

Ni Alex Mapoy

PROTESTA: Walay lipudlipod nga gihulagway sa militanteng grupo sa Caraga nga gipangunahan sa Bayan Caraga ang administrasyong Aquino nga bakakon ug pulos lamang pagpanghaylo ang gihimo. Photo by Mike Glenn Obungen

BUTUAN CITY – Walay lipud-lipod nga gihulagway sa militanteng grupo sa rehiyon sa Caraga nga ang kasamtangang administrasyon ni Pangulong Noynoy Aquino – bakakon ug pulos lamang matod pa pagpanghaylo ang gihimo.

Gibarugan sa grupo nga ang administrasyong Aquino, nakapasamot lamang sa kalisod sa mayoryang Pilipino diin ang gintang sa adunahan ug kabus, ang niinat og pipila ka kilometro ang gintang.

Pamugos sa grupong Bayan Caraga, ang 5 ka tuig nga pangatungdanan ni Aquino, nakapasamot matod pa sa kalisod sa katawhan ug bakak ang gipasiatab sa kagamhanan nga nilambo ang ekonomiya tungod sa mga programang gihulma sa kasamtangang rehimen.

Dako matod pang bakak ang gibida nga islogan ni Aquino, kung walang kurap, walang mahirap, apan sa tinud-anay matod pa nga kahimtang, padayon ug mas dayag ang kurapsyon sa administrasyon.

Gitumbok sa grupo ang nibutong iskandalo ilawom sa administrasyong Aquino ang Pork Barrel ug P144 Billion nga Disbursement Acceleration Program  (DAP) diin susama matod pa og porma, apan gilahi lamang ang pangalan.

Ang nahisgotang pundo, matod pa, gigamit aron suholan ang Kongreso ug sa Local Government Units (LGUs)

Pulos lamang matod pa, mga kontra administrasyon ang napasakahan og kaso sama nila Sen Juan Ponce Enrile, Sen Jinggoy Estrada, ug Sen. Bong Revilla, Jr. samtang sa habig sa administrasyon nga nahimong kakunsabo ni Janet Napoles ang wala pa nakasohi hangtod karon.

Gi-alegahan usab sa grupo ang pipila ka mga membro sa gabinite ni Aquino nga mga kawatan sa salapi sa katawhan.

Pamugos sa grupo, mas nigrabe ang pagpanghuthot sa buwis sa katawhan sa mga ahensya sa goberno samtang nagkaduol ang piliay sunod tuig.

Bulgar pa sa grupo, gihimo lamang gatasan sa mga galastohan sa mga pulitiko ug partido nga gustong makaangkon og posisyon sunod tuig.

Alang kanila, ang gobernong Aquino dili tinuod nga nagsubay sa tul-id nga dalan kondi nagsubay kini sa likuon, lubak nga dalan, ug palpak nga pang-goberno.

Subay sa kataposang State of the Nation Address (SOPA) ni Aquino, gibaktas sa militanteng grupo ang dalang J.C Aquino ning siyudad aron ipasibaw ang kasagmuyo sa kasamtangang goberno.

Gisunog pa ang hulagway ni Pangulong Aquino atubangan sa katawhan isip pagpadayag sa dulot bukog nga kasagmuyo ug kasilag gumikan sa daw binarkada nga pagdumala sa goberno.