Nasipit Gideklarang Most Competitive Municipality

Ni Alex Mapoy

NASIPIT, Agusan del Norte - Dakong garbo sa mga Agusanon human nasakmit sa lungsod sa Nasipit ang unang puwesto alang sa Economic Dynamism Pillar. 

Nanguna sa Economic Dynamism Pillar ang lungsod sa Nasipit, Agusan del Norte alang sa 3rd to 6th Class Municipalities Category. Gisundan kini sa Mambajao, Camiguin Province ug ikatulo ang lungsod sa Jagna, Bohol. 

Ang pasidungog gipresentar didto sa PICC Reception Hall, Vicente Sotto St, Pasay, Metro Manila atol sa gihimong deklarasyon sa Most Competitive Cities, Municipalities, and Provinces sa 3rd Regional Competitiveness Summit.

Lagpas isa ka libo ang nitambong sa maong paghatag pasidungog gikan sa nagkadaiyang kagamhanang lokal, national government agencies, ug pribadong sektor.

Gihimo ang kalihokan aron mahatagan og pasidungog ang gitawag nga local competitiveness isip pundasyon sa national competitiveness.

Ang Cities and Municipalities Competitiveness Index usa ka programa nga gituyo pagmugna aron madasig ang mga lokal nga kagamhanan sa pagtigom ug boluntaryong mo sumite og datos nga magsilbing sukdanan sa nahimo niining performance sa tulo ka pillar o haligi nga gibasi sa global standards: Economic Dynamism, Government Efficiency, ug Infrastructure.

Matag pillar o haligi ang dunay indicator nga maghatag sa tino nga detalye sa kahimtang sa ekonomiya sa matag lokalidad.

Dunay 8 ka indicators alang sa Economic Dynamism, 10 sa Government Efficiency ug Infrastructure diin sa kinatibuk-an mokabat kini og 28 ka mga indicators.

Ang gisumite nga datos sa Local Government Units, pinaagi sa tabang sa partner Academe ug Regional Competitiveness Committees, maoy gamiton alang sa final scoring ug ranking.

Gipasiugdahan kini nga programa sa National Competitiveness Council, alayon sa tinguha sa kagamhanang Aquino nga mapalambo ang nasod pinaagi sa pagtinabangay tali sa nasodnon ug lokal nga ahensya, ingon man sa katawhan ug sa pribadong sektor.