Power Curtailment Gipatuman

Ni Alex Mapoy

ADVISORY: Kon mahuman na ang Preventive Maintenance Shutdown (PMS) sa Steag Power Plant, hopefully, kutob lang ning semanaha ang power curtailment, pagklaro ni Aneco Public Information Officer Danny Dela Cena. Photo by Alex Mapoy

BUTUAN CITY – Gilauman sa kadumalahan sa Agusan del Norte Electric Cooperative, Inc. (ANECO) nga kutob lamang ning semanaha ang pagpatuman og power curtailment.

Mahitabo kini, sumala ni Aneco Public Information Officer Danny Dela Cena kon mahuman ang gipatumang Preventive Maintenance Shutdown (PMS) sa Steag Power Plant.

“Hopefully this week lang kung mahuman na ang PMS sa Steag Power Plant,” panghinaut ni Dela Cena.

Una nang nagpagawas og walo ka adlaw nga schedule sa power curtailment ang kadumalahan sa Aneco subay sa “advise” sa National Grid Corporation of the Philippines (NGCP) human giisa ang Mindanao Grid sa Red Alert Status.

Ang walo ka adlaw nga power curtailment gisugdan adtong Hulyo 21 ug mahuman kini sa Hulyo 28 sa kasamtangang tuig.

Sa maong kahimtang, masinatian sa katawhang Agusanon ug Butuanon ang halos tag-duha ka oras nga pagkawala sa kuryente matag adlaw.

Nasuta nga ang contingency reserve sa Mindanao Grid, nilagpak sa zero gumikan matod pa sa “generation deficiency” ug scheduled preventive maintenance nga gihimo sa National Power Corporation/ Power Sector Assets and Liabilities Management Corp. (PSALM) power plants.

Subay niini, ang NGCP daling nagpatuman sa Mindanao-wide load curtailment.

“SYSTEM ADVISORY: Mindanao Grid is on RED Alert. Contingency Reserve is ZERO due to generation deficiency and scheduled preventive maintenance of the NPC/PSALM power plants. NGCP has required their Mindanao-wide connected customers to implement load curtailment,” advisory sa NGCP.