Safety Tips vs Food Poisoning Gipagawas

Ni Alex Mapoy

TIPS: Angayang mabinantayon ug dili magpataka og palit sa pagkaon aron malikayan ang pagkahilo, awhag ni DOH Caraga Regional Director Dr. Jose R. Llacuna, Jr.

BUTUAN CITY – Mas gipahugtan sa Department of Health (DOH) Caraga ang kampanya sa ahensya nga magpabiling himsog ang panglawas sa katawhang Caraganons ug dili na kini mabiktima sa bisan unsa mang matang sa food poisoning.

Subay niini, nagpagawas og pipila ka healthy and safety tips ang kadumalahan ni DOH Caraga Regional Director Dr. Jose R. Llacuna, Jr. ngadto sa publiko labi na ang mga ginikanan kon unsaon nga malikayan ug dili mabiktima ang mga anak sa posibleng pagkahilo sa pagkaon sa gawas.

Sumala ni Dr. Llacuna, mas maayo nga lutoan sa mga ginikanan ang mga anak og pang-snacks aron makaseguro kining luwas ang pagakan-ong snacks sa mga anak ngadto sa tunghaan.

Gawas sa mga ginikanan, angayan usab ang tanang Local Government Units (LGUs) ug school administrators nga iseguro ug susihon ang nahuptang Sanitary Permits ingon man Health Certificates sa namaligya og pagkaon.

Mas maayo usab matod pa nga tanang namaligya og pagkaon, magbitay og Identification (ID) card labi na niadtong namaligya gawas sa eskwelahan aron dali kining mailhan.

Angayan usab nga maglikay pagkaon sa mga pagkaon nga gibaligya sa mga tawo nga dili kaila ug mo palit lamang niadtong namaligya nga makonsiderang masaligan.

Susihon pag-ayo sa pumapalit kon ang gustong paliton nga produkto ang maayo pa og kondisyon. Lakip usab tan-awon ang package ingon man ang expiration date.

Kon ugaling luto nang daan ang pagkaon, mas maayong susihon kon sakto ba kini pagkaluto ug dili hilaw.

Likayan usab pagpalit sa mga produkto nga nalumping na, niburot, wala nasakto pag-packing, walay label, ug sa mga produkto nga gi-repack nga walay klarong label information.

Hisayran nga kasagaran sa mga timailhan nga kini nahilo sa gikaong pagkaon mao ang pagpanglipong, pagsuka, pagsakit sa tiyan, ug pagkalibang.

Kon ugaling masinatian ang maong mga simtomas, tambag sa direktor nga mas maayong magpahiling gilayon kini ngadto sa doktor aron mahatagan sa saktong medikasyon.