Mall Employees No Remittance sa Pag-Ibig Butuan?

Ni Alex Mapoy

CONTRIBUTION:  Gikomperma ni Pag-Ibig Butuan Branch Manager Christopher Loon, centralized ang account sa mga empleyado sa nahisgotang mga malls hinungdan nga wala dinhe sa Pag-Ibig Butuan Branch gi-remit ang monthly contribution niini. Photo by Alex Mapoy

BUTUAN CITY - Tanang empleyado sa Gaisano Butuan ug Robinson’s Place Butuan ang wala nag-remit sa ilang monthly contribution sa sangang buhatan sa Home Development Mutual Fund (HDMF) o mas nailang Pag-Ibig dinhe sa siyudad.

Sumala ni Pag-Ibig Butuan Branch Manager Christopher Loon, centralized ang account sa mga empleyado sa nahisgotang mga malls hinungdan nga wala dinhe sa Pag-Ibig Butuan Branch gi-remit ang monthly contribution sa mga nahisgotan. 

Dugang ni Loon, ang monthly contribution sa naasoy’ng mga empleyado ang atua gi-remit sa tagsa-tagsa niini ka employer sa lain nilang branch dis-a nahimutang ang Main Office. 

“Robinson, ang mga empleyado diha, centralized ang ilang account, so, ang ilang contribution diha atua gi-remit sa lain namo nga branch. Dili actually dinhe sa Butuan nag-remit sa contribution. Same with Gaisano, Cagayan siya nag-remit,” pagtin-aw ni Loon. 

Gitin-aw sa opisyal, bisan atua pa kini sa lain niini nga branch gi-remit ang ilang monthly contribution, makonsidera pa gihapon kini nga active member kon duna lamang kini 5 consecutive monthly remittance backward. 

Nagtimaan kini, ang membro dunay monthly contribution sa mga bulan sa Pebrero, Marso, Abril, Mayo, ug Hunyo ning tuiga.

Pasabot sa opisyal, kon active member sa Pag-Ibig, mahimo kining makapahimulos sa mga benefits nga angay niining mapahimuslan sama sa salary loan ug daghan pang uban. 

Bisan atua gi-remit sa laing branch ang monthly contribution, kon ang membro gusto nga mag-loan, sa Pag-Ibig Butuan Branch gihapon kini mag-proseso ug magsumite sa gikinahanglang rekisitos. 

Kon makompleto ang tanang rekisitos, ang Butuan Branch na maoy magpadala sa mga dokumento ngadto sa ilang branch sa Cagayan de Oro City sanglit ang maong branch maoy dunay kagahom pag-apruba sa aplikasyon sa membro samtang kon i-follow-up sa hingtungdan ang estado sa aplikasyoin, dinhe na sa Pag-Ibig Butuan Branch himuon sa nahisgotan.