Pagpangrekisa sa Motor Gipahugtan

Ni Alex Mapoy

Giklaro ni SPO4 Anisberto Rivera, Jr. nga daghan ang nagpaso-paso karon nga mga motor nga walay mga papel. Mao na nga kada adlaw mi naga-check. Photo by Alex Mapoy

BUTUAN CITY – Subsob nga pagpangrekisa ang gihimo sa liderato sa Butuan City Police Station (BCPS) 1 sa mga motorista human nasuta nga daghan pa sa mga single motor nga nagbiyahe ning siyudad ang walay kompletong papeles.

Subay niini, gipahugtan ni Police Senior Inspector Nefre Telewik Acaso, Station Commander sa BCPS1 ang pagpahigayon og random checkpoint.

Alayon sa kamandoan, gitambagan ni SPO4 Anisberto Rivera, Jr. ang kasamtangang Officer-In-Charge sa Traffic Section sa BCPS1 ang tanang motorista nga adiser mo biyahe, seguraduhon nga kompleto kini og papeles sama sa Official Receipt, Certificate of Registration, driver’s license, ug naka-helmet.

Tuyo niini, pagtin-aw ni Rivera nga kon kini maka-agi sa gilusad nga random checkpoint, dili na kini malangan pa sanglit kompleto naman kini og papeles.

Tambag usab ni Rivera, kon magmaneho og motor, mas maayong dili kalimtan ang pagsuot og helmet sanglit ang disgrasya dili mahibaw-an.

Pamugos pa sa opisyal, buak man gani ang ulo sa motorista nga naka-helmet, unsa pa kaha kadtong walay helmet, unya madisgrasya.

Pasabot sa opisyal, ang gihimo nilang pagrekisa sa mga motorista mao lamang ang pagseguro sa seguridad sa katawhan ug usab magiyahan ang driver nga matungnan nga mahimong matinumanon sa lagda sa trapiko.

Hangyo usab sa opisyal sa tanang motorista nga marekisa nga dili kini masuko sanglit gihimo lamang nila ang ilang trabaho ang pagseguro sa kaluwasan sa tanan.

“Daghan nagpaso-paso karon nga mga motor nga walay mga papel. Mao na nga kada adlaw mi naga-check. Adlaw ug gabii mi naga-check para ma-determine nato ang mga motorista.”

“Ang akong ihangyo sa motorista nga kon mag-drive, kompleto og dokumento, maghelmet gayud. Unya, magsubay kita sa balaud trapiko para ang pagpadagan sa atong sakyanan dili ta malangan kay usa diha, malangan gyud kon ang dokumento, kulang,” tambag ni SPO4 Rivera.