Monday, July 27, 2015

Probation Officers Gisaludohan

Ni Alex Mapoy
LIVELIHOOD: Nakig-tie up ang mga field probation officers ngadto sa government agencies aron mahatagan og katumanan ang ipatumang livelihood programs sumala ni DOJ-PPA Caraga RD Lina K. Burdeos. Photo by Alex Mapoy
BUTUAN CITY – Saludo ang kadumalahan sa Parole and Probation Administration (PPA) Caraga sa tanang field probation officers sa paghimo og kaugalingong inisyatiba aron makapatuman sa nagkadaiyang programang panginabuhian ngadto sa tanan niining kliyente.

Hisayran nga daghang mga livelihood programs ang napatuman sa nagkadaiyang field probation offices sa ahensya ning rehiyon diin ang mga kliyente maoy nabulahan.

Pipila niini mao ang paghimo og tsinelas, pagpanahi, pagpamuhi og kahayopan, ug daghan pang uban.

Sumala ni DOJ-PPA Caraga Regional Director Lina K. Burdeos, gikalipay sa iyang kadumalahan nga daghang livelihood programs ang napatuman sa nagkadaiyang field probation offices kansang katuyoan nga matabangan ang tanan niining kliyente.

Dugang ni RD Burdeos, nahatagan og katumanan ang tanang livelihood programs tungod sa tabang sa national agencies sama sa Technical Education and Skills Development Authority, Department of Labor and Employment, Department of Social Welfare and Development, ug daghan pang uban.

Gitin-aw sa opisyal, dili kini mahatagan og katumanan kon dili pa maayo ang relasyon sa nagdumala sa mga field offices ngadto sa partner government agencies.

“Kining mga livelihood programs sa mga kliyente, mo tie-up ang mga probation officers sa mga buhatan sama sa TESDA, DOLE, DSWD aron nga unsay mga programa niini nga mga ahensya makaambit sab ang atong mga kliyente. Usahay nay requirements ang TESDA, kinahanglan ang atong mga kliyente, i-form nato og association, naa ra na sa atong mga field probation officers nga mahimong active sa pakig-link-up sa mga national agencies,” pahayag ni RD Burdeos.

Sa DOJ-PPA Butuan nga gidumala ni Chief Probation and Parole Officer Cristina R. Argente, ubay-ubay usab nga mga programang panginabuhian ang napatuman tungod sa maayo niining relasyon ngadto sa nagkadaiyang ahensya sa kagamhanan.

Ang nahisgotang mga programa, napatuman tungod usab sa pag-abag sa kaubanan ni Argente nga sila PPO II Alex CastaƱos ug PPO II Ester Samano.

No comments:

Post a Comment