Lagyong Kabaranggayan, Gisulod sa PopCom

Ni Alex Mapoy

SESSION: Gisulod ang hilit nga kabaranggayan sa rehiyon sa Caraga aron katudloan kabahin sa Adolescent Reproductive Health and Responsible Parenthood-Family Planning Services/Interventions sa tabang sa U4U (You-for-You) Teen Trail ug Kalalakihang Tumutugon sa Responsibilidad at Obligasyon sa Pamilya (KATROPA). Photo courtesy of PopCom Caraga

LORETO, Agusan del Sur – Tresentos otso (308) ka mga Agusanon nga nanimuyo sa hilit nga barangay sa lungsod sa Loreto Agusan del Sur ang nakapahimulos sa Adolescent Reproductive Health and Responsible Parenthood-Family Planning Services/Interventions sa tabang sa U4U (You-for-You) Teen Trail ug Kalalakihang Tumutugon sa Responsibilidad at Obligasyon sa Pamilya (KATROPA) sesyon nga gipasiugdahan sa Population Commission (PopCom) Caraga.

Ang maong ihap naglangkob sa 225 ka mga batan-on ug 83 ka mga amahan kinsa maoy nitambong sa gipahigayong duha ka adlaw nga Peace Caravan sa nasangpit nga lungsod.

Gikalipay pag-ayo sa kabatan-onan ang maong sesyon sanglit ilang nasayran ang mga bililhong kasayoran nga angay nilang mahibaw-an luyo sa linghod nilang pangidaron.

Pipila sa nakat-onan sa mga nahisgotan ang kabahin sa Reproductive Health lakip ang ilang batakang katungod ug sekswalidad.

Lakip usab nga ilang nasayran ang kabahin sa makatakod nga sakit sama sa Human Immunodeficiency Virus Infection and Acquired Immune Deficiency Syndrome (HIV/AIDS) ingon man ang kabahin sa peligrong hatod sa sayong pagsabak.

Sa pikas bahin, nasabtan pag-ayo sa mga nitambong nga amahan ug kalalakin-an atol sa gipahigayong KATROPA sessions ang kabahin sa bililhon niining papel labi na sa pagmintina sa gitawag og Family Health.

Nag-ugat ang hisgotanan sa kinatibuk-ang kaakohan isip amahan o haligi sa pamilya diin mintinahon ang kahimsog niini sa panglawas aron madumala pag-ayo ang pamilya, i-asdang ang batakang katungod sa mga anak, ipadayon ang sadya nga pamuyo, himsog nga relasyon tali sa amahan ug anak, maningkamot nga mahimong responsableng amahan ug planohon pag-ayo ang pamilya.

Si PopCom Caraga Regional Director Alexander Makinano nagkanayon ang importansiya sa maong sesyon nga matabangan ang kabatan-onan nga maila ang kaugalingon, mahimong himsog ang relasyon tali sa barkada ug maoy manguna sa pagbugtaw sa maayong ugma samtang ang kalalakin-an ug mga amahan nahitsasan kabahin sa igong kahibalo ug katakos unsaon pag-atiman ang nagsabak niining asawa ingon man pagpadako sa anak nga himsog aron ang kaugmaon maseguro.