Monday, July 27, 2015

Karne Gisegurong Luwas Konsumohon

Ni Alex Mapoy 
CLEANLINESS: Paningkamotan sa buhatan nga tanang 
karne nga konsumohon sa publiko, luwas kining kan-on, 
pahayag ni NMIS Caraga Senior Meat. Control Officer 
Dr. Bernadette Montenegro. Photo by Alex Mapoy
BUTUAN CITY – Tahas sa National Meat Inspection Service (NMIS) Caraga nga luwas konsumohon ang tanang gibaligya nga karne sa bisan asang dapit ning rehiyon.

Subay niini, subsob ang gihimong inspeksyon ngadto sa kamerkadohan ingon man establisyemento nga namaligya og karne.

Dili lamang ang merkado ug establisyemento maoy gisusi sa mga personahe sa ahensya kondi lakip na usab ang dapit nga ihawanan nga gitawag sa ingles nga slaughter house kon kini limpiyo ba o dili.

Tuyo lamang sa ahensya nga masegurong limpiyo ang gibaligyang karne nga paliton sa katawhang Caraganon.

Sumala ni NMIS Caraga Senior Meat. Control Officer Dr. Bernadette Montenegro, estrikto ang ahensya kon hisgotan na ang kalimpiyo sa palibot nga gi-displihan sa karne.

Dugang ni Dr. Montenegro, lakip usab nga ilang gipaseguro nga tanang sales girl o sales boy ang dunay Health Card ID aron maseguro nga wala kini sakit nga mananakod nga mahimong mo tapot sa karne ug makonsumo sa konsumidor.

Subay niini, gi-awhag sa opisyal ang publiko nga kon dunay mamatikdan nga dili maayo sa gibaligyang karne, hugaw ang palibot sa gidisplihan ingon man storage, mahimo kining ipaabot sa ilang buhatan pinaagi sa pagtawag sa ilang hotline No. 816-0078.

Pasalig sa opisyal, pabiling confidential ang identity sa tanang mo sumbong sa ilang buhatan aron dili kini dumtan.

No comments:

Post a Comment