U4U sa Dinagat Gihangop

Ni Alex Mapoy

Aktibong nilambigit ang kabatan-onang estudyante sa gipahigayong workshop kinsa gustong masayod kon unsaon pagdala ug pag-atubang sa bisan unsang hagit sa kinabuhi. Photo courtesy of PopCom Caraga

DINAGAT ISLANDS PROVINCE – Mainitong gihangop sa mga estudyante sa duha ka lungsod nga sakop sa probensya sa Dinagat Islands ang gipakusgan nga You-for-You (U4U) nga gipasiugdahan sa Population Commission (PopCom) Caraga adtong Lunes.

Ang duha ka mga lungsod nga dungan nga gipahigayonan sa maong kalihokan ang lungsod sa Dinagat ug Libjo.

Aktibong nilambigit ang mga magtutungha sa nasangpit nga kalihokan labi na sa gipahigayong workshop.

Dumduman nga gipasabot ni PopCom Caraga Information Officer III and Technical Section Chief Rutchie C. Saluta, katuyoan sa U4U nga mapugngan ang “sexual risk behaviours” sama sa pre-marital sex, teenage pregnancy, ug sayong pagsulod sa kaminyuon, matuki ang nagkadaiyang reproductive health problems lakip na ang gitawag nga non-sexual risks sama sa pagpanigarilyo, pag-inom, ug pagamit sa gidiling druga.

Magsilbi usab kining paagi nga mahimong andam ang batan-on sa pag-atubang sa bisan unsang hagit sa kinabuhi sa tabang sa isigka-batan-on.

Mas epektibo matod pa ni Saluta nga ang batan-on maoy mo tambag sa isigka-batan-on kon duna kini suliran nga gihambin sanglit makonsiderang “at home” ug komportable ang hingtungdang batan-on sa pagpaminaw sa isigka-batan-on nga nitambag kaniya.

Sahi matod pa ang mga hamtong maoy mo tambag sanglit mas “authoritative” kini hinungdan nga ang batan-on nga problemado, maglisod og padayag sa kinatibuk-an niining suliran.

Gawas niana, pinaagi sa U4U, mahatagan sa haum nga impormasyon ang kabatan-onan sibo sa lebel sa pangidaron diin matabangan ang kaubanang batan-on pagsabot lambigit sa sexuality, pagpalambo sa saktong pamatasan, paghimo sa responsableng desisyon, ug ma-andam usab kini isip responsableng indibidwal.