Funeral Benefits Patas-an

Ni Alex Mapoy

FUNERAL BENEFITS: State-agency will increase funeral benefits from “a fixed amount of P20,000 to a variable amount ranging from a minimum of P20,000 to a maximum of P40,000,” depending on the member’s number of contributions and average monthly salary credit (AMSC).

BUTUAN CITY – Gipatas-an na sa Social Security System (SSS) ang makuhang funeral benefits sa membro sugod karong bulan sa Agosto sa kasamtangang tuig.

Ipatuman kini human gi-aprubahan ni Pangulong Noynoy Aquino ang benefit enhancement sa membro.

Sumala ni SSS Butuan Assistant Branch Head Arnold Pepino, nakalatid sa SSS Circular No. 2015-009, patas-an sa ahensya ang funeral benefits gikan sa kanhi P20,000 himuon na kining P40,000.

Nagtimaan kini, madawat sa nabiling benepisyaryo sa membro ang funeral benefits nga dili mo ubos sa P20,000 hangtod P40,000 depende sa ihap sa kontribusyon ug sa gitawag nga average monthly salary credit (AMSC).

Dugang ni Pepino, ang maong usbaw, ma-aplay sa tanang funeral benefit claims sugod karong Agosto 1.

Pasabot sa opisyal, ang funeral benefits, kwentahon gamit ang fixed amount nga P20,000 plus porsyento sa kinatibuk-ang monthly contributions sa membro ug AMSC.

Gipatas-an ang maong benepisyo sanglit sa pinakaulahing pagtuon nga gihimo sa ahensya, nimahal ang galastohan sa burial services nga halos moabot sa P40,000.

Ang SSS funeral benefit ihatag nga cash ngadto sa claimant, apan kon ang membro mamatay sulod ning bulana, Hulyo 2015, ang funeral benefits nga makuha nilansang pa sa P20,000.

Subay niini, gilauman sa opisyal nga ang projected funeral claims sa matag tuig, mosaka sa halos 12 porsyento katumbas sa P332 milyones kada tuig sa tibuok nasod.

Basi sa datos, ang SSS funeral benefit payouts adtong Abril 2015 sa tibuok nasod, niabot sa P1.01 bilyon diin mas dako kini og 2.4 porsyento kon itandi sa nakalabay’ng tuig nga anaa lamang sa P987 milyones.

Dali usab nga giklaro sa opisyal, bisan nitaas ang funeral benefit claims, wala kini nakapalugi sa SSS fund ug walay igong rason nga patas-an ang contribution rate.