100th Million Babies sa Caraga, Nagselebrar

Ni Alex Mapoy

BIRTHDAY CELEBRATION: Dungan nga giselebrar sa pito ka mga bata sa rehiyon sa Caraga ang unang tuig nga kasumaran sa ilang pagkatawo. Ang pito ka mga bata maoy gikonsidera sa PopCom Caraga nga nalakip sa han-ay sa 100^th Million Filipino Babies. Photo by Alex Mapoy

BUTUAN CITY – Pito ka mga bata ang dungan nga nagsaulog sa First Year Birthday sa ikaduhang andana sa Jollibee, J.C. Aquino Avenue ning siyudad sa Butuan kagahapong adlawa.

Gipasiugdahan sa Population Commission (PopCom) Caraga ang maong selebrasyon isip pag-ila sa mga nahisgotan kinsa gikonsiderang nalakip sa han-ay sa 100^th Million Filipino Babies dinhe sa rehiyon.

Naglangkob kini nila Arhea Jabonillo Damasco, taga – Purok 8B, Tolosa, Cabadbaran City; Lyca Jane Geroy Rudado, residente sa Purok 6, Tiniwisan, Butuan City; Zhyraiah Orillaneda Tranquilan, nagpuyo sa Purok Caimito, Burgos, Cortes Surigao del Sur; Bella Christina Matugas Lincuna, nanimuyo sa 235 Borromeo St., Surigao City; Queen Genyvic Malate Juanillo, taga - Purok 3, Tag-abaca, Basilisa, Dinagat Island Province; July Marie Aquino Dahug, residente sa Purok 1, Patin-ay, Prospoeridad, Agusan del Sur; ug James Mark Dinao Montalban, nanimuyo sa Purok 1, Fili, Bayugan City.

Alayon niini, gidasig ni PopCom Caraga Regional Director Alexander Makinano ang tanang ginikanan nga dugangan ang kakugi aron mahatag ang inadlaw’ng panginahanglan sa mga anak, wala pay labot ang panginahanglan sa pamilya.

Dugang ni Makinano, kon unsa ang paningkamot niadto dihang wala pa nadugangan ang anak, mas maayong dugangan pa ang paningkamot karon nga nadugangan ang anak aron dili maglisod ang pamuyo.

Samtang, gikomperma ni PHIC Caraga Field Operations Division Head Angelina R. Luta, ang pito ka mga bata ang awtomatiko kining cover sa PhilHealth.

Usa kini ka pribilihiyo nga gihatag sa goberno sa nahisgotang mga bata diin ang monthly premium ang abagahon kini sa nasodnong kagamhanan.

Personal usab nga gitunol ni Luta ang PhilHealth card ngadto sa ginikanan sa nahisgotang mga bata dungan sa pagdasig nga kon wala pa kini na membro sa ahensya, mas maayo usab kining magpa-membro aron matabangan pag-abot sa panginahanglang medikal.

Sa laing bahin, gikomperma usab ni National Nutrition Council – DOH Nutritionist-Dietician Teresita Lina Medrano, himsog ug walay angay kabalak-an ang panglawas sa pito ka mga bata basi sa inisyal niining paghiling.

Nagtimaan kini, matod pa ni Medrano nga gi-atiman pag-ayo ang mga bata sa hingtungdang ginikanan.

Alayon niini, gidasig sa opisyal ang mga ginikanan nga ipadayon ang pagpasuso sa anak hangtod duh aka tuig aron magtubo kini nga himsog ug lantip ang salabotan.