DOJ-PPA Caraga RD Burdeos, Gitakdang Hulipan

Ni Alex Mapoy

PERFORMANCE: Gihulagway ni DOJ-PPA Caraga 

RD Lina K. Burdeos nga nahimong mabungahon ang 

5 ka tuig niini nga pagdumala sa rehiyonal nga buhatan. 

Photo by Alex Mapoy

BUTUAN CITY – Gitakdang biyaan ni Parole and Probation Administration (PPA) Caraga Regional Director Lina K. Burdeos ang rehiyonal nga buhatan aron dawaton ang bag-ong assignment nga gihatag sa nasodnong ahensya kaniya sugod karong Agosto 3, 2015.

Subay niini, hulipan si Dir. Burdeos ni Regional Director Josefina Cinco kinsa kasamtangang nadestino sa rehiyon sa Davao.

Gikan sa rehiyon sa Caraga, dumalahon ni Dir. Burdeos ang rehiyon X (Northern Mindanao Region).

Si Dir. Burdeos ang lumad nga Butuanon kinsa kasamtangang nagpuyo sa lungsod sa Buenavista Agusan del Norte.

Gidumala sa direktor ang buhatan sa DOJ-PPA Caraga sulod sa 5 ka tuig samtang ang mo hulip kaniya sa buhatan ang lumad nga Sugbuanon.

Sumala ni RD Burdeos, daghang kalamposan  ang nahimo diin mas napalambo niya ang performance sa tanan niining probation and parole officers.

Ang tanang basic skills ang nahatag sa direktor ngadto sa tanan niining personahe sa rehiyon kansang katakos magamit sa mga nahisgotan aron mahimo kining epektibo sa tahas nga gisangon kanila.

Nipuwesto usab ang DOJ-PPA Caraga sa ikatulo sa tibuok nasod kon hisgotan ang participation rate sa nahimo niining kliyente partikular na sa pagpatuman sa Therapeutic Community Program.

Lagpas usab sa 1,000 ka mga Volunteer Probation Aides (VPAs) sa tibuok rehiyon ang na recruit sa ahensya butang nga gikalipay pag-ayo sa opisyal.

Ubay-ubay usab sa mga personahe ang na promote sa posisyon tungod usab sa maayo niining performance.

“Murag akong na improve ang among performance dinhe. Ang pagpalambo sa performance sa atong mga tawo, permi mani nato gi-monitor. Masakto gayud nuh. Ma-audit gayud ang ilang performance sa unsay ilang dapat buhaton isip mga probation and parole officers ug pagpahigayon sa mga programa sa ahensya. Ato kanang na monitor pag-ayo.”

“Karon ganing first quarter sa 2015, ang atong region, Caraga region, nag-rank siya og number 3 sa entire agency, nuh sa participation rate sa atong mga kliyente sa pagpatuman sa Therapeutic Community Program. Subra sa 98% ang atong mga kliyente ang napailawom gayud sa maong programa. So, ikatulo kita sa entire Philippines sa Parole and Probation Administration parte sa atong participation rate sa atong mga kliyente.”

“Successful kaayo ang atong Therapeutic Community Program. Kining mao nga program usa kini ka treatment modality nga gi-adopt sa ahensya para nga ma-reform ang atong mga kliyente tungod kay niini nga coverage, mao ang pagtul-id sa behaviour, pagpalambo sa iyang psychological well-being, unya paghatag sa iyaha og skills para magamit sa ilang pagpanarbaho. So, daghang kliyente ang napailawom sa Therapeutic Community Program.”

“Ang atong mga parole and probation officers, ato gyud kining gi-equip sa mga basic skills aron nga mahimo silang epektibo sa pag-implementar niini nga programa. Daghan sab kitay na recruit sa Caraga region sa Volunteer and Probation Aides. Sa Caraga alone, we have 1,000 plus volunteers. Kini sila nagpuyo ni sa kabaranggayan diin diha usab nagpuyo ang atong mga kliyente,” pahayag ni RD. Burdeos.