Salas Awardees Nipasalig

Ni Alex Mapoy 

Gidasig sa Regional Rafael M. Salas Population and Development Awardees ang cheque nga magamit pagpadayon pagpatuman sa Population Management Program sa Population Commission. Photo by Alex Mapoy

BUTUAN CITY – Pursigido ang duha ka lokal nga kagamhanan nga ipadayon ang adbokasiya niining nasugdan ang pagsuporta sa Health and Management and Population Development sa Population Commission (PopCom).

Ang maong pasalig sa duha ka Local Government Unit (LGU) awardees gipasibaw subay sa pormal nga pagdawat sa pasidungog ug ganti.

Subay sa gihimong awarding ceremony sa Rafael M. Salas Population and Development Award (RMSPDA) nga gipahigayon sa Main Atrium, Robinsons’ Place Butuan, gipasidunggan sa PopCom Caraga ang lungsod sa Cantilan, Surigao del Sur alang sa municipal category ug dakbayan sa Butuan alang sa city category.

Nadawat sa matag awardee ang plaque of appreciation ug ang cheque balor P50 mil pesos nga pagagamiton sa pagamug-ong proyekto lambigit sa gipakusgan nga adbokasiya sa komisyon.

Personal nga gidawat ni Cantilan Municipal Health Officer Dr. Tomas B. Cruiz isip representante ni Cantilan Mayor Genito B. Guardo ug Butuan City Mayor Dr. Ferdinand Amante, Jr. ang pasidungog.

Gipasabot ni PopCom Caraga Regional Director Alexander Makinano, ang Rafael M. Salas Population and Development Award gituyo pagmugna aron ipadayon ang legasiya ni Salas.

Dugang ni Makinano, nagtumong usab kini sa paghatag pag-ila sa mga LGUs, non-government officials, indibidwal, ug institusyon nga hugot bakos nga nisuporta sa Population Management Program.

Kinasingkasing usab nga gidasig ni DOH Caraga Regional Director Dr. Jose Llacuna, Jr. ang tanang stakeholders nga aktibo kining molambigit ug mo suporta sa tanang programa sa goberno aron makab-ot ang maayong resulta.

Pamugos ni Dr. Llacuna, ang hisgotanan sa kahimsog sa panglawas usa ka multifactorial problem nga angayang tabangan sa paghatag kasulbaran.

Hugot ang pagtuo sa direktor nga kon daghan ang magtinabangay, daghan usab ang mahimong kaayohan alang sa tanan.

Giselyohan ang pasalig sa duha ka LGUs pinaagi sa pagperma sa Memorandum of Agreement (MOA) nga gisaksihan ni DOH  Caraga Regional Director Llacuna, Jr.