Agriculture’s Employees Gibansay

Ni Alex Mapoy

Gidayeg ni DA Caraga Regional Director Edna Mabeza ang tanang nitambong sa Regional Rice Initiative: Phase II sa Veranda, Carmen Agusan del Norte. Photo courtesy of DA Caraga Public Relations Officer II Aurelius P. Arais

BUTUAN CITY – Singkwentay siete (57) ka mga partisipante ang nitambong sa napulo ka adlaw nga Refresher Training Course lambigit sa Regional Rice Initiative: Phase II sa Veranda, Carmen Agusan del Norte.

Na gikan ang nahisgotang mga nitambong sa nagkadaiyang DA Regional Offices, Provincial Agriculture’s Offices, City Agriculture’s Office, ug Municipal Agriculture’s Offices sa tibuok nasod.

Gipasiugdahan ang maong kalihokan sa Department of Agriculture (DA) ug United Nations – Food and Agriculture Organization (FAO).

Tumong sa kalihokan nga mahatagan og katumanan ang pangandoy sa kagamhanang Aquino nga makab-ot ang tinguha nga ang Pilipinas makabaton sa abundang suplay sa pagkaon.

Gawas niana, gitinguha usab nga makuhaan ang galastohan sa pagtikad sa yuta, mo taas ang abot, ug mo dako ang kita sa mga mag-uuma.

Sumala ni DA Caraga Public Relations Officer II Aurelius P. Arais, naka-sentro ang maong mga pagbansay sa pagahimuong inobasyon ug malahutayong paagi diin gi-usa ang rice ecosystems, landscapes, ug value sa usa ka konsepto – ang Save and Grow.

Ang maong konsepto hinimo sa FAO isip bag-ong paagi aron mo daghan ang abot sa pananom kansang paagi dili makadaut sa kinaiyahan.

Gi-usa usab ang tradisyunal nga kahibalo ug modernong teknolohiya nga mo sagop sa panginahanglan sa small-scale producers.

Sa maong paagi, makonserba ang kinaiyahan ug mapabalik ang katabunok sa yuta.

Gipasabot ni Agriculture Undersecretary for Policy and Planning Segfredo Serrano, nunot sa pag-usab sa panahon, duha lamang ang mahimong kapilian – ang pagpugong o kaha paghangop sa dagan sa panahon aron mapahaum ang lakang himuon aron mo kita pa gihapon ang mga mag-uuma.

Si DA Caraga Regional Director Edna Mabeza nagdayeg sa tanang partisipante sa kasibot nga gipakita sa maong pagbansay dungan sa panghinaut nga pag-uli sa tagsa-tagsa ka mga rehiyon, daghang mag-uuma ang matudloan sa kahibalong nakat-onan aron ang mga nahisgotan magmabungahon ug mahimong malamboon ang pagtikad sa kaumahan.