Tuesday, August 11, 2015

Imported Meat Embargohon

Ni Alex Mapoy
Embargohon ang imported meat kon inigbalik sa grupo, gi-display pa gihapon kini ug wala gisulod sa freezer, pagtin-aw ni NMIS Caraga Senior Meat Control Officer Dr. Bernadette Montenegro. Photo by Alex Mapoy
SAN FRANCISCO, Agusan del Sur – Pursigido ang kadumalahan sa National Meat Inspection Service (NMIS) Caraga nga embargohon ang gibaligyang imported meat sa usa ka negosyante sa lungsod sa San Francisco, Agusan del Sur kon magpadayon kini pagmagahi pagsunod sa saktong proseso sa pagbaligya niini.

Sumala ni NMIS Caraga Senior Meat Control Officer Dr. Bernadette Montenegro, nakadawat og reklamo ang ilang buhatan gikan kang San Francisco Mayor Jenny De Asis kabahin sa sayop nga paagi sa pagbaligya sa negosyante sa imported meat.

Basi sa asoy ni Dr. Montenegro, gibaligya sa negosyante kinsang pangalan gipugngan ning mantalaan ang maong pork jowl skin (imported meat), ang gi-display kini sa nahisgotan.

Giklaro sa opisyal, ang maong paagi pag-display sa imported meat ang dakong sayop sanglit ang sakto, ibutang kini sulod sa freezer aron dili madaut.

Ang maong reklamo daling girespondihan sa mga personahe sa rehiyonal nga buhatan ug didto nasuta nga tinuod ang maong sumbong.

Gitambagan ang maong negosyante nga dili i-display ang maong imported meat kondi isulod kini kanunay sa freezer aron dili madaut dungan sa paghatag pasidaan nga kon inigbalik sa grupo, padayong i-display ang imported meat ug wala gisulod sa freezer, dili na sila magpanuko pag-embargo sa maong karne.

Nasayran ang pork jowl skin gi-angkat gikan sa nasod sa Germany ug wala kini nahibaw-an kon kanus-a giihaw sa importer.

“Ang problema lang is, ang pagbaligya didto, gipareha niya sa bag-ong ihaw. Dili niya ipareha sa bag-ong karne, dapat ang imported, i-frozen na siya. Kon mamaligya ka og imported, frozen gyud imo gamiton,” pahayag ni Dr. Montenegro.

No comments:

Post a Comment