Tuesday, August 11, 2015

Magtutudlo Giobliga Pagpahiling

Ni Alex Mapoy
ORDER: Gimandoan ni DepEd Caraga OIC Regional Director Dr. Rebecca Delapuz ang tanang magtutudlo nga magpahiling kada tuig aron mapugngan ang pagkuyanap sa sakit nga mananakod kon ugaling kini mataptan. Photo by Alex Mapoy
BUTUAN CITY Tanang magtutudlo sa rehiyon sa Caraga ang gi-obliga pagpailawom sa tinuig nga pagpahiling sa panglawas.

Katuyoan niini nga mahibaw-an ang estado sa panglawas kon wala ba kini nataptan sa makatakod nga sakit sama sa TB.

Sumala ni Department of Education (DepEd) Caraga OIC Regional Director Dr. Rebecca Delapuz, importante nga mahibaw-an ang kahimtang sa panglawas sa mga magtutudlo sanglit numero uno nga mabutang sa alanganin ang kabataan nga gitudloan matag adlaw.

Dugang ni Dr. Delapuz, segurado nga matakdan ang kabataang magtutungha sa sakit nga mananakod nga mitapot sa magtutudlo sanglit mao kini kanunay nga gikaatubang sa adlaw nga tanan.

Subay sa selebrasyon sa National Lung Month, nanghinaut ang direktor nga walay magtutudlo ning rehiyon ang makabaton o mataptan niining matanga sa sakit sa umaabot nga panahon.

Giklaro sa opisyal, walay ni bisan isa ka magtutudlo ning rehiyon ang nataptan sa maong klase sa sakit.

Bisan pa man, gipaneguro sa opisyal nga kon dunay magtutudlo nga mataptan sa maong sakit, awtomatiko niya kining awhagon nga mag-leave aron dili matakdan ang mga batang magtutungha.

“All teachers are required an annual examination to prevent tuberculosis. Hope no teacher has this kind of illness. Kon dunay magtutudlo nga mataptan, i-advise nako dayon nga mag-leave aron walay estudyante nga matakdan,” pahayag ni Dr. Delapuz.

Kinasingkasing usab kining nagpasalamat sa kadumalahan sa Department of Health (DOH) Caraga tungod sa padayon niining paghatag pagtagad sa panglawas sa kabataan.

No comments:

Post a Comment