Tuesday, August 11, 2015

Pagtuo Gihataga’g Katin-awan

Ni Alex Mapoy
SSS Butuan Assistant Branch Head Arnold Pepino
BUTUAN CITY – Katumbas lamang sa isa hangtod duha ka bulan nga sweldo sa membro sa Social Security System (SSS) ang puwede nga ma-loan sa hingtungdan.

Kini ang nahimong pagtin-aw ni SSS Butuan Assistant Branch Head Arnold Pepino subay sa konsepto sa pipila nga gamay lamang matod pa ang ma-loan sa membro labi na kon una kining higayon nga mag-loan.

Sumala ni Pepino, ang ma-loan sa membro mag-depende kini sa binulang sweldo sa hingtungdan ug sayop ang konsepto sa uban nga kon magbalik-balik sa pag-loan, magdako ang kantidad nga puwedeng ma-utang.

Dugang ni Pepino, mo dako ang kantidad nga puwedeng ma-loan sa membro kon mo dako usab ang binulan niining sweldo nga gidawat, apan kon wala ni-usbaw ang sweldong gidawat sa hingtungdan, ang pinakadakong kantidad nga puwedeng ma-loan ang katumbas pa gihapon kini sa duha ka bulan nga sweldo.

Ang maong loan, pagabayran sa hingtungdan sulod sa 24 ka bulan katumbas sa duha ka tuig.

Mahimo kining maka-renew sa pag-loan bisan wala pa kahuman pagbayad sa daang loan kon kini makabayad na og katunga sa kinatibuk-ang kantidad nga na loan ug miabot na sa 12 ka bulan o isa ka tuig ang period gikan sa daang loan.

Ang nahibilin nga utang ang i-deduct kini sa bag-ong kantidad nga paga-utangon sa hingtungdan diin ang bugtong makuha mao na lamang kadtong subra sa kinaltasan. 

Gipasabot usab sa opisyal, kon ugaling ang kantidad nga gi-loan sa membro gibayran sulod lamang sa unom ka bulan, dili kini puwede nga maka-renew gilayon pag-loan sanglit ang period gikan sa pag-loan ang wala pa nakaabot og isa ka tuig.

Nagtimaan kini nga magpaabot pa ang hingtungdan og laing unom ka bulan aron mainsakto isa ka tuig gikan sa pag-utang ayha kini maka-renew.

Bugtong maka-avail sa loan mao lamang kadtong membro nga dunay pinakaubos nga kontribusyon nga 24 ka bulan ug giila nga active member.

No comments:

Post a Comment