Thursday, August 13, 2015

Blood Expiration, Wala Nasinati sa Red Cross

Ni Alex Mapoy
BUTUAN CITY – Gikomperma sa kadumalahan sa Philippine Red Cross (PRC) Agusan del Norte - Butuan City chapter nga walay ni bisan isa ka bag sa dugo ang ni-expire sa kasaysayan sa buhatan.

Sumala ni PRC Agusan del Norte – Butuan City Chapter Blood Center In-Charge Dan Mark B. Moral, kanunay kulang ang suplay sa dugo sa buhatan hinungdan nga imposible nga dunay stock nga dugo sa buhatan ang ma-abtan og expiration.

Hisayran nga mo duwa sa 400 hangtod 600 ka bag sa dugo ang makolekta sa buhatan matag bulan kansang koleksyon ang dili ka apas sa panginahanglan sa dugo.

Kada bulan, ang buhatan nanginahanglan og labing minus 800 ka bag sa dugo aron masuplayan ang panginahanglan sa mga Agusanon lambigit sa dugo.

Ang life span sa dugo moabot lang og 35 ka adlaw hinungdan nga kon mo lapas kini sa maong gidugayon, mo expire na.

Gi-angkon ni Moral nga bisan subsob ang gihimo sa buhatan nga bloodletting activity sa nagkadaiyang dapit sa Agusan, pakyas gihapon sila pag-abot sa gikinahanglang suplay.

Subay niini, padayon nga gi-awhag sa opisyal ang tanang Agusanon ug Butuanon nga boluntaryong mo donar sa kaugalingong dugo aron maabot ang gikinahanglang suplay sa buhatan nga 800 ka bag kada bulan.

Pamugos sa opisyal, dako og matabang ang i-donar nga dugo ngadto sa nanginahanglan og dugo sanglit maluwas ug masumpayan ang kinabuhi sa pasyente.

No comments:

Post a Comment