Tuesday, August 11, 2015

Caraganon Ipailawom sa Census

Ni Alex Mapoy
Tanang Caraganons ang gi-awhag ni PSA Caraga Interim Regional Director Dr. Rosalinda Celeste – Apura nga magpa-Census sa manumbalay nga mga field personnel sa Philippine Statistics Authority (PSA) Caraga. Photo by Alex Mapoy
BUTUAN CITY – Pormal nang gisugdan sa Philippine Statistics Authority (PSA) Caraga ang pagpahigayon og Census sa tanang populasyon ning rehiyon ug mahuman sa umaabot Setyembre 6 ning kasamtangang tuig.

Mokabat sa 2,770 ka mga field personnel ang manumbalay sa tibuok rehiyon aron mag-Census.

Sa kinatibuk-ang ihap, 2,054 niini mga Enumerators, 534 ang Team Supervisors, 134 mga Census Area Supervisors (CAS), 34 ka Head Census Area Supervisors, ug 14 ka mga CAS Supervisors kinsa maoy ipakatah sa lima ka mga probensya nga naglangkob sa Agusan del Norte, Agusan del Sur, Surigao del Norte, Surigao del Sur, ug Dinagat Island Province.

Ang malakip sa Census mao kadtong natawo sa Agosto 1, 2015 alas-12:01 sa kadlawon pa atras ug kadtong mga tawo nga namatay paghuman sa alas-12:01 sa maong petsa.

Samtang, walay labot nga i-census kadtong natawo adtong Agosto 1 ning tuiga nga nilagpas sa alas-12:01 sa ka adlawon ug kadtong indibidwal nga namatay adiser ang Agosto 1, 2015 alas-12:01 sa kadlawon.

Giawhag ni PSA Caraga Interim Regional Director Dr. Rosalinda Celeste – Apura ang tanang Caraganons nga magpa-Census sa ipakatag nga personahe ug ihatag ang hustong detalye.

Ang kalihokan sa PSA Caraga ni-ani ug suporta gikan sa nagkadaiyang ahensya sa goberno sama sa National Economic Development Authority (NEDA) Caraga ug daghan pang uban.

Bugtong awhag ni NEDA Caraga Regional Director Mylah Faye Aurora B. Cariño sa tanang Caraganon, “Magpabilang. Magpa-Census!”

Pasabot sa opisyal, importante ang mga datos nga makuha sa mga field personnel sa PSA Caraga sanglit magamit kini sa umaabot nga mga lakang pagahimoon sa kagamhanan.

No comments:

Post a Comment