Tuesday, August 11, 2015

Parole Clients Nag-Bayanihan

Ni Alex Mapoy
BUTUAN CITY – Daling nagkasabot ang mga kliyente sa Parole and Probation Administration (PPA) Butuan nga mag-Bayanihan aron matabangan ang isa sa mga kaubanan nga makabangon human na apil pagka-ugdaw ang gipanag-iyahang panimay sa Purok 8 Slaughter, Brgy. Obrero ning siyudad adtong Lunes sa hapon.

Naila ang isa sa mga biktima sa sunog ug kasamtangang kliyente sa DOJ-PPA Butuan nga si Rudy Palma kinsa yanong nanimuyo sa maong dapit ug nanginabuhi sa merkado pinaagi sa pagpaninda og mga gulay ingon man mga lamas.

Sumala ni Chief Probation and Parole Officer Cristina R. Argente gikalipay sa iyang buhatan ang lakang gihimo sa mga kliyente nga tabangan nga makabalay ang kaubanan niining nasunogan.

Dugang ni Argente, wala siya gadahom nga mo himo og inisyatiba ang iyang mga kliyente kinsa nag-amot amot ug ang natigom, giihap sa iyang atubangan og niabot kini sa P888.

Subay niini, nakahukom ang kadumalahan ni Argente nga ang donated confiscated logs gikan sa Department of Environment and Natural Resources (DENR) Caraga nga alang unta sa pagpatukod og waiting-shed sa Trevolution Site, Brgy. Bancasi ning siyudad ang ihatag ngadto sa nasunogan nga kliyente aron kini makabalay.

Gipasabot ni Parole and Probation Office II Alex Castaños, mas gipili ni Argente nga ihatag ang maong donated nga kahoy sa ilang kliyente sanglit nakita niini ang hinanaling panginahanglan diin ang balay isa sa mga basic needs sa matag usa.

Boluntaryo usab ang mga kliyente nga niadto sa dapit nga nasunogan ug nagtinabangay pagpabarug sa balay kinsa nag-iyahay pagdala og gamit pangpanday.

Ang pipila usab nga kliyente nga dunay sakyanan maoy naghakot sa kahoy aron dunay magamit nga materyales pagpabarug sa panimay.

Nakadayeg usab si Argente kang Castaños nga gumikan sa gihimong lecture kabahin sa Therapeutic Community (TC) isip kabahin sa Restorative Justice Program sa ahensya, nihimo og inisyatiba ang ilang mga kliyente nga nagtimaan lamang nga nituhop sa tagsa-tagsa ka galamhan ang diskusyon sa nahisgotan.

No comments:

Post a Comment