Fixers Nidagsa, PhilHealth Naalarma

Ni Alex Mapoy

Kenneth Po of PhilHealth Caraga. Photo by Alex Mapoy

BUTUAN CITY – Naalarma ang Philippine Health Insurance Corporation (PhilHealth) human nadawat ang impormasyon nga nidagsa ang daghang fixers sa nagkadaiyang Local Health Insurance Office sukad gipatuman ang Republic Act 10645 o mas naila nga An Act Providing for the Mandatory PhilHealth Coverage for All Senior Citizens.

Puntirya sa mga fixers ang mga senior citizens kinsa nagpa-membro sa PhilHealth aron kini makabenepisyo sa kaayohan nga gihanyag sa goberno.

Modus sa mga fixers mao ang paghanyag og serbisyo ngadto sa mga Senior Citizen diin kini maoy maningamot pagproseso sa mga dokumento ngadto sa PhilHealth ug pagkahuman, mangayo kini og bayad.

Subay niini, gipinahan sa ahensya ang tanang membro labi na ang mga Senior Citizen nga dili kini magpailad sa mga fixers aron dili kini mabiktima.

Una nang nidagsa sa nagkadaiyang Local Health Insurance Office ang mga senior citizens aron magpalista sa PhilHealth sa ingon, makapahimulos sa kaayohan nga gihanyag sa goberno.

Ang pagdagsa sa mga senior citizen, sumala ni Kenneth Po sa PhilHealth Caraga, gisakyan sa mga fixers aron kini makapangilad ug makasapi gikan sa mga tigulang.

Subay niini, gikomperma ni Po nga daling nagpagawas og Circular 33 series of 2014 si PhilHealth President and Chief Executive Officer Alexander A. Padilla kansang katuyuan mao ang pag-awhag sa tanang senior citizen nga magpalista sa PhilHealth pinaagi sa pagpatabang sa Office of Senior Citizens Affairs (OSCA).

Nakig-alayon na usab ang PhilHealth sa Department of Social Welfare and Development (DSWD), mga rehistradong organisasyon sa Senior Citizen sa nasod, mga non – government organization o bisan ang mga non- profit private organization aron segurado nga ma-membro ang mga senior citizen sa tanang suok sa nasod nga dili mailad sa mga fixers.

Nanghinaut ang opisyal nga pinaagi niini, magiyahan ang katawhang Pilipino labi na ang mga senior citizen aron dili kini mailad sa nidagsa nga mga mangingilad.