Monday, April 27, 2015

Gugma Gipaagi sa Blood Donation

Ni Alex Mapoy
Boluntaryo nga nagpakuha sa ilang dugo.
BUTUAN CITY – Mainitong gisuportahan sa tanang membro sa World Mission Society Church of God – Butuan ang gihimong bloodletting activity nga gipahigayon sa Robinson’s Place Butuan adtong Dominggo sa hapon.

Boluntaryo nga nagpakuha ang mga membro sa ilang dugo labi na kadtong ni-qualify sa gihimong screening sa mga personahe sa Philippine Red Cross (PRC) Butuan – Agusan del Norte chapter.

Segon ni Pastor Sunghwan Park sa World Mission Society Church of God – Butuan, dako ang gibati niining kalipay nga bisan pinakauna kini nga kalihokan nga ilang gihimo, mainiton kining gisuportahan sa iyang mga membro.

Dugang ni Pastor Park, gihimo nila ang maong kalihokan isip pagpadayag ug pagpaambit sa gugma sa Dios pinaagi sa paghimo sa bloodletting activity.

Pastor Sunghwan Park sa World Mission Society
Church of God – Butuan
Nakita sa grupo ni Pastor Park nga daghan ang nanginahanglan og dugo ug ang pag-donar sa kaugalingong dugo ngadto sa isigkatawo, magsilbing usa ka paagi nga gitabangan kini sa hingtungdan nga masumpayan ang kinabuhi sa pasyente.

Sa bahin usab ni Ailyn Namata, usa ka sales woman ug membro sa maong grupo, gipadayag sa nahisgutan nga dako ang ilang kalipay nga sa paghimo og bloodletting activity, ilang mapadayag sa ginagmay nga paagi ang gugma sa Langitnong Amahan ug Inahan  ngadto sa uban.

Sayod usab si Namata nga daghan ang nanginahanglan og dugo ug sa maong paagi, ikalipay niya nga makapaambit sa kaugalingong dugo aron ang ma-abunohan masumpayan ang hinulaman niining kinabuhi.

Gipasabot usab sa nahisgutan nga ila kining gihimo nga kalihokan isip pagpangandam sa nagsingabot nga Passover sa bag-ong kasabotan alang sa kaluwasan sa tanan ug maangkon sa katawhan ang hingpit nga kinabuhi.

Nasayran nga ang World Mission Society Church of God, nagpahigayon og blood drive dili lamang dinhe sa Pilipinas kondi gihimo kini sa tibuok kalibotan aron daghang kinabuhi ang maluwas gikan sa kamatayon.

No comments:

Post a Comment