Kamatayon ni Osias, Dakong Kawad-on sa PopCom

Ni Alex Mapoy

BUTUAN CITY – Dakong kawad-on sa Population Commission (PopCom) ang kalit nga kamatayon sa kanhi POPCOM Executive Director  nga si Tomas Osias adtong Mayo 16, alas-12:30 sa ka adlawon.

Namatay si Osias sa Notre Dame Hospital nga nahimutang sa dakbayan sa Baguio.

Nahiabot ang nahisgutan sa Baguio sanglit duna kini gitambongan nga official engagement diin mohatag siya og mensahe, apan pagka-kaadlawon, giataki kini sa sakit sa kasingkasing.

Subay niini, daling nipagawas ang liderato ni PopCom Caraga Regional Director Alexander Makinano sa Resolution No. 1 series of 2015 aron ipadayag ang pagbangutan sa rehiyonal nga buhatan sa kamatayon ni Osias.

Gikabutyag ni PopCom Caraga Information Officer II Angelita Antonio, nabati nila ang kahaw-ang nga nawad-an sa makonsiderang haligi sa komisyon labi na nga bisan niretiro na kini sa serbisyo, nagsilbi pa gihapon kining consultan sa komisyon.

Si Osias maoy giila nga “longest-serving executive director” sa komisyon.

Ilawom sa kadumalahan sa nahisgutan, gipatuman ang Family Planning Program sa kagamhanan.

Nagsilbi usab siya nga “advocate” sa paghingusog sa “responsible parenthood” sa nanglabay nga katuigan adiser napalabang ang Reproductive Health (RH) law adtong 2012.

Dili makalimtan si Osias sa komisyon sanglit daghan kini nabilin nga legasiya sama sa paghingusog nga mabatokan ang kawad-on, maternal and infant health, pagtudlo sa epektibo ug mas sayon nga family planning methods.”

Usa sa dili matod pa malimtan sa komisyon ang gibalik-balik nga tambag sa nauwahi ngadto sa mga magtiayon nga duna kini katungod nga mo pili unsa nga klase sa “method” aron maplano pag-ayo ang mugnaon nga pamilya.