SSS: Kaso Batok Employer Naglinya

Ni Alex Mapoy 

SSS Butuan Assistant Branch Head Arnold Pepino.
Photo by Alex Mapoy

BUTUAN CITY – Naglinya ang mga kaso nga gisang-at sa Social Security System (SSS) Butuan ngadto sa korte batok na sa mga employer nga wala nituman sa obligasyon.

Nagtimaan kini nga padayon nga nagkadaghan ang ihap sa mga employer nga nilapas sa Republic Act 8282 o mas naila nga Social Security Act of 1997 dinhe lamang sa dakbayan sa Butuan.

Pipila sa mga kalapasan nga nahimo sa mga employer mao ang kapakyas pag-remit sa monthly contribution, wala pag-deduct sa gidawat nga sweldo sa empleyado, wala pag-declare sa hustong sweldo hinungdan nga gamay lamang ang remittance, ug kon gi-remit man, kanunay late.

Sa nakalatid sa RA 8282 partikular na sa Section 28 (e), ang kapakyas o pagdumili sa employer pagpa-rehistro sa mga empleyado, o kaha pag-deduct og kontribusyon gikan sa binulan nga sweldo sa empleyado o kaha pag-remit sa kontribusyon ngadto sa SSS, ang ni bisan kinsa nga employer nga mapamatud-ang sad-an, multahan og P5, 000 – P20, 000 ug bilangguon gikan 6 ka tuig hangtod 12 ka tuig.

“Failure or refusal of an employer to register their employees, or to deduct contributions from the employee's compensation and remit the same to the SSS, corresponds to a penalty of fine from P5,000 to P20,000 and imprisonment from six (6) years to twelve (12) years,” nakalatid kini sa RA 8282, Section 28(e).

Gikabutyag ni SSS Butuan Assistant Branch Head Arnold Pepino, daghan nga mga empleyado sa nagkadaiyang pribado nga kompanya ang nangusog pagreklamo human ulahing nahibaw-an nga pakyas ang ilang employer pagtuman sa RA 8282.

Dugang ni Pepino, kon nasuta sa empleyado sa usa ka kompanya nga wala gisunod sa employer ang gitakda sa balaud, angayan kining mo reklamo ug andam ang lokal nga buhatan paghatag sa hinanaling aksyon.

Kadtong mga employer nga ireklamo, padalhan kini sa buhatan og personahe aron imbestigahan ang maong alegasyon, apan kon dili mo kooperar ang hingtungdang employer, kon kursonada ang reklamante nga mo pasaka og kaso batok sa amo, andam kining tabangan sa buhatan.

Sa nakalabay’ng bulan, hisayran, gipasidan-an ni SSS Senior Vice President and Chief Legal Counsel Voltaire P. Agas ang tanang employer sa tibuok nasod labi na kadtong mga “delinquent member-employer” nga sundon ang nakalatid sa RA 8282.

Mando ni Agas, i-remit ang kontribusyon ug salary loan payments sa mga empleyado sa hustong petsa sa ingon dili kini mamultahan.