Tuesday, May 19, 2015

Binuhing Mananap Namiligro

Kabaw niping-it sa El Niño. Sagbot nag-yellow sa kainit.
AGUSAN DEL NORTE – Delikado sa kahayopan ang nasinatian nga subra ka init sa panahon sa probensya hinungdan nga gitambagan sa kadumalahan sa Provincial Veterinary Office ang mga Agusanon.

Angayan nga dili mahimong kampante ang mga Agusanon labi na kadtong dunay kahayopan nga atimanon ang mga binuhi ug dili pasagdan nga mabulad sa init.

Sumala ni Provincial Veterinarian Dr. Belen Aruelo, kon gibantog ang mga binuhing baka nga agwantador sa kainit sa panahon, apan ning panahona, mas maayong isilong kini mintras dili pa kaayo mamahit ang kainit sa adlaw aron dili maugtas.

Dugang ni Dr. Aruelo, angayan usab nga pa imnon og daghang tubig ang mga binuhing hayop sama sa kabaw, baka, kanding, baboy, manok, iro, ug uban pang kahayopan aron kini makalahutay sa kainit sa panahon.

Pamugos sa opisyal, kadtong mga binuhing mananap nga buntis, likayan nga mabulad kini pag-ayo sa init sanglit posibleng madaut ang gibuntis niini.

Tambag pa sa opisyal, mas maayo usab nga kumpayan ang mga binuhing mananap aron mintras gisilong kini sa kahoy o kaha sa hinimo niining silunganan, duna kini kalingawan sa pagkaon.

Kadtong mga binuhi nga kinahanglan makatuna sama sa kabaw, mas maayong maghimo ang hingtungdan og tunaan aron dunay katunaan ang binuhi niining hayop.

Alang sa opisyal, ang pagbuhi sa bisan unsang klase sa mananap, dili sayon sanglit nanginahanglan kini og igong panahon aron dili kini mamatay tungod sa subrang pagpasagad.

Ang pagbuhi dili lamang kutob sa pagbalhin ngadto sa tawid o kasagbotan sanglit kinahanglan kining isilong ug dili ibuwad sa tibuok adlaw sanglit mahimong ikamatay ang subra ka init sa panahon.

Nanghinaut na lamang ang opisyal nga mahimong responsable ang matag Agusanon sa pag-atiman sa mga binuhi niining kahayopan.

No comments:

Post a Comment