House and Lot Gidawat sa The Voice Grand Champion

Ni Alex Mapoy 

Turnover and Ribbon Cutting Ceremony. Photo by Alex Mapoy

BUTUAN CITY – Pormal nang gidawat sa Grand Champion sa “The Voice of the Philippines” Season 2 ang “house and lot” nga premyo gikan sa Camella Homes.

Ang “The Voice of the Philippines” Season 2, gipasiugdahan sa higanteng kompanya sa telebisyon sa Pilipinas – ang ABS-CBN.

The Voice of the Philippines Season 2 Grand
Champion Jason Dy and Camella NorthMin
Cluster Head Emelia Lustado.
Photo by Alex Mapoy

Si Jason Dy, 24 anyos, ulitawo, malipayon nga nidawat sa isa ka yunit nga panimay sa Camella, sinaksihan sa mga kabanay, suod nga mga higala, ug mga tigbalita.

Gikabutyag ni Dy, mas gipili niya nga dinhe sa dakbayan sa Butuan kuhaon ang “house and lot” sanglit dinhe siya nagpuyo ug gusto usab niya nga dinhe siya mag-ulian.

Dugang ni Dy, malipayon siya nga nidawat sa maong yunit sanglit wala siya nagdahom nga makaangkon sa maong klase sa panimay.

Si Camella NorthMin Cluster Head Emelia Lustado, malipayon nga nitimbaya kang Dy sa kalamposan nga na angkon sa kinabuhi.

Dugang ni Lustado, bukas ug gikalipay sa ilang kompanya sa nakab-ot nga desisyon ni Dy nga dinhe sa dakbayan sa Butuan kuhaon ang premyo niining isa ka yunit.

Isip pormal nga pagdawat, usa ka hamubo nga “turnover ceremony” ang gihimo diin mismo si Dy maoy nagputol sa ribbon sinaksihan ni Lustado og mga katawhan.

Hisayran nga isip kampeon sa maong indigay, gawas sa house and lot, nadawat ni Dy ang P1 million cash prize, isa ka brand new Ford Fiesta, recording contract sa MCA Universal, ug daghan pang uban.

Ang 24 anyos nga singer, natawo adtong Hunyo 19, 1990 dinhe sa siyudad sa Butuan.

Balay nga abot sa paningkamot ni Jason Dy. Photo by Alex Mapoy

Adiser nahimong inila, tuig 2003, nagbulag ang ginikanan ni Dy ug tuig 2014, na aprubahan sa korte ang giduso niining annulment.

Sa maong kahimtang, nagpuyo si Dy uban sa iyang inahan hangtod  nanimpad sa Singapore sa pagpangita og trabaho.

Nakahuman sa sekondarya si Dy sa Father Saturnino Urios University – High School Department.

Sa ingon masuportahan ang personal niining panginahanglan, nagtrabaho isip haranista si Dy hangtod niapil sa The Voice of the Philippines Season 2 ug dinhe nagsugod ang iyang pagkasikat.