Special Non-Working Day, Gideklara

Ni Alex Mapoy

BUTUAN CITY – Gideklara sa Malacañang ang Mayo 19 nga special non-working day sa dakbayan sa Butuan isip paghatag bili sa kapistahan sa siyudad pinaagi sa patron niining si Senior San Jose.

Nakalatid sa Proclamation No. 1021 nga gipermahan ni Executive Secretary Paquito N. Ochoa, Jr. pinaagi sa nasangpit nga deklarasyon, mahatagan og kahigayonan ang mga Butuanon pagselebrar sa kapistahan ug pagpahigayon sa Balangay Festival.

Gi-aprubahan kini ni Ochoa ubos sa pagtugot ni Pangulong Noynoy Aquino adtong Mayo 15 ning kasamtangang tuig.

“Now, therefore, I, Paquito N. Ochoa Jr., Executive Secretary, by authority of His Excellency, Benigno S. Aquino III, do hereby declare Tuesday, 19 May 2015, as a special (non-working) day in the City of Butuan,” tipik sa deklarasyon.

Subay sa maong selebrasyon, naka-alerto ang tanang kapulisan partikular na ang mga ginsakpan sa Butuan City Police Office uban sa pag-abag sa ginsakpan ni Station Commander Police Senior Inspector Nefre Telewik Acaso sa Butuan City Police Station 1 aron mahatagan og seguridad ang mga Butuanon ingon man ang mga dayo nga luwas nga makasalmot sa kasaulogan.

Isip pagpahugot sa seguridad, gidugangan pa ang puwersa sa nahisgutang presento aron makatabang pagbantay sa mga tawo labi na sa mga nag-unang lugar nga maoy sagad nga gidagsa sama sa simbahan, plaza, mall, ug daghan pang uban.

Tinguha sa kapulisan nga saulogon ang kapistahan sa tanang Butuanon ug sa mga dayo nga hapsay, malinawon, ug malipayon.