Wednesday, July 1, 2015

KATROPA Dalan sa Pagka-Responsableng Bana

Ni Alex Mapoy
Komitido ang mga nahisgotan nga mahimong responsableng bana subay sa  paglusad sa Kalalakihang Tumutugon sa Responsibilidad at Obligasyon sa Pamilya (KATROPA). Photo by Alex Mapoy

 BUTUAN CITY – Paghimong responsableng bana ang nag-unang katuyoan nganong gilusad sa Population Commission (PopCom) Caraga ang  Kalalakihang Tumutugon sa Responsibilidad at Obligasyon sa Pamilya (KATROPA) sa Dotties Place Hotel and Restaurant nga nahimutang sa dalang J.C Aquino sakop ning siyudad kagahapong Martes.

Sumala ni PopCom Caraga Regional Director Alexander Makinano, nakita sa komisyon nga panahon na nga ilusad ang KATROPA aron eduka ang kalalakin-an kabahin sa importante niining papel labi na diha sa pamilya aron mahimong responsableng kapikas.

PopCom Caraga Regional Director Alexander Makinano. Photo by Alex

Mapoy
Dugang ni RD Makinano, gimugna ang KATROPA isip kabahin sa paghingusog nga makab-ot ang tinguha sa Philippine Population Management Program (PPMP) nga matabangan ang magtiayon nga makab-ot ang produktibo niining tinguha sa pamilya.

Gipasabot ni RD Makinano, ang KATROPA usa kini ka paagi nga maila ang bililhong papel sa kalalakin-an lambigit sa “reproductive health” labi na sa “maternal health” ug “family planning” ug malikayan ang posibleng pagpasakit tali sa magtiayon.

Sa kamugnaan sa KATROPA, naglaum ang direktor nga mahimong aktibo ang kalalakin-an sa hisgutanan sa Reproductive Health and Responsible Parenthood ug pinaagi sa pagrekognisa sa dako niining kaakohan, mahimo kining responsableng bana.

Gawas niana, malikayan na unya nga dunay kinabuhi sa inahan nga makalas atol sa pagpanganak o kaha bisan sa pagbuntis tungod sa pagpasagad sa bana.

Si DOH Caraga Local Health Support Division Chief Dr. Ernesto Pareja nisaad nga andam ang ahensya sa panglawas pagtabang sa komisyon labi na sa KATROPA aron mahatagan og kasulbaran ang suliran sa pamilya sa hisgotanan sa kahimsog sa panglawas labi na sa paghitsas sa igong kahibalo ngadto sa kalalakin-an aron mahimo kining responsibleng amahan.

Nipadayag usab si Joel Duque sa grupong Karancho nga suportahan nila ang bag-ong proyekto sa komisyon diin ila kining sugdan pinaagi sa makanunayong pagpahimangno sa kaubanan nga amomahon ang kaugalingon ug dili pasagdan ang panglawas aron mahimo kining epektibo sa paghimo sa kaakohan sulod sa panimay isip pangulo sa pamilya.

Tinguha lamang sa KATROPA nga mahimong aktibo ang kalalakin-an sa paglambigit sa pag-atiman sa kahimsog sa panglawas, mapanalipdan ang asawa ingon man mga anak, malikayan ang wala planoha nga pagsabak, malikayan ang pagkamatay sa asawa samtang kini nagsabak o kaha pagpanganak, ug malikayan ang bisan unsa mang porma sa pagpanakit.

Bunga niini, mahimong luwas nga manganak ang nagsabak nga asawa ug mahimong planado ug hapsay ang pamuyo tungod sa tabang ug suporta sa bana. 

No comments:

Post a Comment