19 Rain Water Collectors Gimuntar

Ni Alex Mapoy

Residente sa Brgy. Magsaysay nagbaktas gikan sa Purok 1 padulong sa Sitio Dao aron magkabo og tubig. Courtesy of DSWD Caraga

GENERAL LUNA, Surigao del Norte – Dise-nuwebe (19) ka mga Rain Water Collectors ang hingpit nga napahimuslan sa mga residente sa Brgy. Magsaysay sakop sa nahisgutang lungsod.

Nasayran nga upat ka pamilya ang magtabang sa 1 ka Water Rain Collector kansang tubig nga matigom o masawod gikan sa ulan ang igo nga gamiton sa pipila ka mga adlaw.

Basi sa impormasyon nila Raniel John A. Sampiano ug Eunice G. Montaos, ang Regional Information Officer III sa Kapit-Bisig Laban sa Kahirapan- Comprehensive and Integrated Delivery of Social Services (KALAHI-CIDSS) sa Department of Social Welfare and Development (DSWD) Caraga, adiser nahatagan og Water Rain Collectors ang mga residente sa nahisgutang barangay, gihimo sa mga residente aron makatubig mao ang pagbaktas og tulo ka kilometro padulong sa Sitio Dao aron lamang magkabo og tubig.

Pait matod pa ang kahimtang sa mga residente sanglit tungod sa kalayo, dunay pipila ka mga residente ang mangadlawon lang pagmata aron magkabo og tubig sa Sitio Dao samtang ang uban, didto na magkabo og tubig sa Brgy. Tawin-Tawin dis-a nahimutang ang duha ka atabay.

Si Tatay Erlindo Sulapas, 69 anyos, residente sa maong barangay nagbutyag nga gikalipay niya pag-ayo human nadunggan sa iyang silingan nga andam motabang ang DSWD sa ilang komunidad pinaagi sa programa niining Kalahi-CIDSS.

Dugang ni Sulapas, dihang nagpahigayon sila og asembliya, gisugyot nila ang water reservoir sub-projects, apan gumikan kay dili pa igo ang pundo nga gigahin, gisugyot na lamang nila ang rain water collectors ug kini nahatagan og katumanan.

Si Jun-jun, 10 anyos, nagbutyag nga dihang ni-ulan sa ilang lugar, wala na kini nagkabo og tubig sa Sitio Dao sanglit nakatigom sila og tubig gikan sa ulan.

Gikalipay usab sa bata nga gumikan sa maong pasilidad, wala na kini nakabaktas og halos 30 minutos padulong sa Sitio Dao aron magkabo og tubig.

Gikab-an gilayon ni Analyn ang Rain Water Collector human nasudlan sa tubig ulan. Courtesy of DSWD Caraga

Subay niini, gitambagan ni DSWD Caraga Regional Director Minda B. Brigoli ang mga molupyo sa maong barangay nga ampingan ug atimanon ang nahisgutang pasilidad aron ila kining mapuslan sa taas nga panahon.