4 Aftershocks Natala, Estudyante Patay

Ni Alex Mapoy

BURGOS, Surigao del Norte – Upat ka mga aftershocks ang natala human niigo ang 6.1 magnitude nga linog sa lungsod sa Burgos sakop sa probensya sa Surigao del Norte adtong Bernes, alas-2:43 sa hapon.

Unang aftershock niigo sa lungsod sa Burgos sakop sa maong probensya nga dunay gikusgon nga 3.2 magnitude diin nitay-og alas-4:28 sa hapon sa samang adlaw.

Ikaduhang pagtay-og, nahitabo alas-6:23 sa hapon nga dunay gikusgon nga 2.2 magnitude kansa niigo sa lungsod sa General Luna sa samang probensya.

Ikatulo ug ikaupat nga linog niiini sa lungsod sa Burgos nga dunay gikusgon nga 2.5 magnitude ug 2.1 magnitude, mga pasado alas-7:32 sa gabii ug alas-11:58 sa gabii.

Una niini, kalit nga nidagko ang balud sa kadagatang bahin sa Surigao human niigo ang 6.1 magnitude nga linog sa lungsod sa Burgos pasado alas-2:43 sa hapon sa nahisgotang adlaw.

Sa datos sa Philippine Institute of Volcanology and Seismology (PHIVOLCS), ang epicenter sa nahisgotang linog natala sa 47 kilometros sa amihanang sidlakan sa lungsod sa Burgos sa nahisgutang probensya.

Nasuta nga duna kini gilagmon nga 26 kilometros ug gitumbok nga tectonic ang hinungdan sa pagtay-og.

Subay niini, nabati ang intensity 5 sa dakbayan sa Surigao, lungsod sa General Luna, ug Bucas Grande sakop sa Surigao del Norte; Talacogon, Agusan del Sur; ug Carrascal, Surigao del Sur.

Intensity 4, nabati sa Dinagat Island ug dakbayan sa Butuan.

Nabati usab ang intensity 3 sa dakbayan sa Tandag, Surigao del Sur; Balanginga ug Guiuan, Eastern Samar; San Juan, Hinunangan ug St. Bernard, Southern Leyte; Tacloban City, Palo ug Dulag, Leyte; Lapulapu City; Consolacion, Cebu; Gingoog, Misamis, Oriental; Davao City.

Intensity 2 sa dakbayan sa Bislig ug Hinatuan, Surigao del Sur; Mambajao, Camiguin; ug Cagayan de Oro City.

Intensity I sa Polangco, Zamboanga del Norte ug Dipolog City.

Bunga sa hitabo, nanglumba sa pagpanagan pagawas sa nag-unang shopping malls ning rehiyon ang mga shoppers tungod sa kabalaka nga mahugno ang malls sa maong insidente.

Si Lorgen Torete nagbutyag nga ang iyang mga paliton unta nga mga gamit pangbalay ang iyang gibiyaan sulod sa mall dihang niapil usab siya pagdagan kuyog sa panon sa mga shoppers pagawas aron ihikling ang kaugalingon sa mas luwas nga lugar.

Gawas niana, isa ka kinabuhi sa estudyante ang nakalas sa lungsod sa Balingasag, probensya sa Misamis Oriental human gituohan nga gi-ataki sa gihambin niining balatian nga rheumatic heart disease dihang nahitabo ang linog.

Sa nakuhang kasayoran, giila sa Provincial Disaster Risk Reduction and Management Council (PDRRMC) Misamis Oriental ang namatay nga si Joshua Yamson, Grade 8 student sa Sta. Rita College nga nahimutang sa maong lungsod.

Gipahayag matod pa ni PDRRMC Officer-in-Charge Fernando Dy nga sutaon una nila kon gi-ataki ba ang biktima sa gihambin niining sakit adtong tungura nga maoy naghatod sa kalit niini nga kamatayon.

Daling gidala ang biktima sa Northern Mindanao Medical Center (NMMC), apan gideklara kini sa mga doktor nga dead on arrival.